Buail lenár mac léinn ar socrúchán ag Ollscoil Aberystwyth: Laurie Stevenson Uas.

21 Samh 2022

Tá lúcháir orainn fáilte a chur roimh Laurie Stevenson go foireann Brainwaves. Thángamar le chéile léi le déanaí chun cluinstin uaithi faoina cuid staidéir agus faoi conas a fuair sí ról sa tionscadal.

Táim ag déanamh céim i gCaomhnú Fiadhúlra ag Ollscoil Aberystwyth agus ba trí sheans a fuair mé an socrúchán seo. D’fhreastail mé ar choláiste talmhaíochta, áit ar aimsigh mé an spéis atá agam san éiceolaíocht. Le linn mo chéime ansin, ghnóthaigh mé spéis ar leith i dtalmhaíocht inbhuanaithe agus i nuálaíochtaí a bhaineann le bia a tháirgeadh do dhaonra a bhíonn ag fás, nuálaíochtaí amhail feirmeoireacht ingearach agus córais fáis hidreaponaigh.

Nuair a bhí mé ag pleanáil mo thráchtais, sheol mé ríomhphost chuig Dylan Gwynn-Jones chun a fháil amach cén obair a bhí ar bun aige. Thairg sé deis dom ansin mo chéim a athrú ina céim ceithre bliana agus socrúchán aon bhliana a dhéanamh ar thionscadal BRAINWAVES. Táim ag obair go cianda ar an socrúchán le beagán os cionn dhá mhí anuas, agus mé ag tabhairt faoi obair dheascbhunaithe amhail athbhreithniú a chur le chéile ar na páipéir is deireanaí ar na nithe difriúla a scrúdaítear i dtaighde ar ros lachan. D’fhéach mé go sonrach ansin ar an taighde ar ros lachan agus ar an tionchar a imríonn córais éagsúla solais ar fhás agus ar thógáil cothaitheach. Táim ag tabhairt faoi obair i bpearsa sna saotharlanna le mí anuas, agus bím ag baint taitneamh as an ngné phraiticiúil den socrúchán.  

Táim ag tnúth leis an gcuid eile de mo shocrúchán agus le deis a fháil, b’fhéidir, chun cuairt a thabhairt ar Choláiste na hOllscoile, Corcaigh, chun breathnú ar an taighde atá ar bun ann. Táim ag smaoineamh anois faoin tionscadal a dhéanfaidh mé mar chuid de mo shocrúchán. San am i láthair, táim ag smaoineamh faoi rud éigin amhail an méid próitéine atá i ros lachan a thomhas agus a ionramháil d’fhonn an phróitéin sin a úsáid i mbeatha beostoic. Mar aon le deis a thabhairt dom rannchuidiú le taighde eolaíoch gníomhach agus le cuma an-mhaith a bheith air ar mo CV, tá súil agam go léireoidh an socrúchán seo dom cad ba mhaith liom a dhéanamh tar éis céim a bhaint amach agus go dtabharfaidh sé léargas dom ar ghairm thaighde.