Barr na gCnoc
Maoiniú de Luach €1m Buaite ag Tionscnamh Gaelscolaíochta de chuid Choláiste na hOllscoile Corcaigh
Bhí tionscnamh Gaelscolaíochta de chuid Choláiste na hOllscoile Corcaigh, ar na cúig buaiteoirí faoin Mhaoiniú Feidhmiúil de chuid an Údaráis um Ard-Oideachas 2023 a fógraíodh ag ócáid in Ollscoil Teicneolaíochta an Oir-Dheiscirt i gCeatharlach.
Faoi cheannas an Ollaimh Phádraig Ó Macháin, Stiúrthóir Ionad na Gaeilge Lahartha COC, atá na tionscnamh seo. Sa bhliain 2017 chuaigh COC i bpáirt le Coláiste Pobail Thraolaigh Mhic Shuibhne i gCnoc an Chuilinn, Cnoc na hAoine, i dtuaisceart chathair Chorcaí, chun tacaíocht a thabhairt dóibh i mbunú Aonaid Lán-Ghaeilge sa scoil, mar a ndéanfaí gach ábhar a theagasc tré Ghaeilge, ón gcéad bhliain ar aghaidh go dtí an Ard-Teistiméireacht. Freagra ar éileamh ón bpobal féin ab ea é seo, go gcuirfí rogha sa mheánoideachas ar fáil dá bpáistí i gceantar ina mbraitheann go leor daoine go bhfuil siad fágtha i leataoibh ag an saol. Tugadh cuireadh do COC páirt a ghlacadh sa togra seo, agus ba dá thoradh sin a bunaíodh an tionscnamh dár teideal Barr na gCnoc.
Comhpáirtíocht phobail is ea Barr na gCnoc. Páirtíocht is ea é idir Coláiste Pobail Thraolaigh Mhic Shuibhne, pobal Chnoc na hAoine, Coláiste na hOllscoile Corcaigh, agus an Bord Oideachais agus Oiliúna.
Bhain an tacaíocht a sholáthraigh COC don scoil nua le réimsí éagsúla. Cuireadh ragana barr feabhais ar fáil do na múinteoirí sa scoil Bhéarla i dtreo go bhféadfaidís aistriú go dtí an tAonad Lán-Gaeilge. Faoi urraíocht na Comhairle um Oideachas Gaeltachta agus Gaelscolaíochta a eagraíodh na ranganna sin. Cuireadh scoláiríochtaí ar fáil do na daltaí nua agus eagraíodh turasanna ar an nGaeltacht dóibh. Bhí i gceist leis an dtacaíocht chomh maith gur ghlac ionadaithe ó COC páirt i gcruinnithe poiblí a bhain le bunú an aonaid. Eagraíodh ranganna Gaeilge chomh maith do na tuismitheoirí.
Príomh-thoradh Barr na gCnoc, tar éis gur bunaíodh an tAonad Lán-Ghaeilge, ná go bhfacthas gur fheidhmigh an t-oideachas lán-Ghaeilge sa cheantar bocht seo mar fhuascailteóir oideachasúil agus sóisialta do na daltaí. Bhí cruthú feabhsaithe acadúil le tabhairt faoi deara iontu, agus dearcadh nua ina measc i leith rudaí dob fhéidir leo a bhaint amach i gcúrsaí oideachais san am athá le teacht. Bhí i gceist chomh maith, cumasú pobail, rud nárbh ionadh ós ón bpobal féin a d’eascair an togra chéadlá. Na torthaí suaithinseacha seo go léir a dheimhngh gur thogra é Barr na gCnoc dob fhiú tógaint air agus a fhairsingiú.
Is de bharr a rathmhaire is a bhí an tionscnamh seo a fuair Barr na gCnoc aitheantas i bhfoirm mhaoinithe ón Údarás um Ard-Oideachas. Cuirfidh an maoiniú mór seo an tionscnamh i gcumas ar leathnú amach go scoileanna eile agus tacaíocht sa Ghaeilge a sholáthar dóibh sna trí bliana athá romhainn.