‌Suite gar do Pháirceanna na Laoi tá Áras Uí Thuama. Beidh tú sona sásta san árasán nua-aimseartha seo i dteannta le mic léinn eile. Beidh tú ar do sháimhín só i do sheomra codlata úrnua, compórdach a bhfuil áiseanna staidéir ann. Gaeltacht na hOllscoile atá anseo ina bhfuil bloc de naoi n-árasán (le dhá, trí, ceithre sheomra codlata iontu). Fan i dteagmháil le do chairde ar an ríomhphost nó déan do chuid taighde ar do shuaimhneas san áras breá seo tríd an idirlíon atá ar fáil saor in aisce. Cuirfidh tú aithne ar mhic léinn ó gach coláiste agus beidh craic agaibh le chéile.

Chomh maith leis sin, ní bheidh ocras ort riamh agus ollmhargadh díreach in aice leat mar a bhfuil rogha gach bia ar fáil. Níl an ollscoil ach cúig neomat de shiúl na gcos uait agus tá Áras Uí Thuama an-chóngarach do lár na cathrach. Oireann na hárasáin seo do gach gné ded’ shaol. Cad eile a bheadh ag teastáil ó mhac léinn an lae inniu?

Imeachtaí an Árais 2025-2026

Eagraítear roinnt imeachtaí do na scoláirí fad is atá siad ag fanacht in Áras Uí Thuama. 

Cuireadh fáiltiú ar siúl 24 Meán Fómhair 2025 do na scoláirí atá ag fanacht sna hárasáin i mbliana. Seo a leanas liosta de na cainteoirí a bhí i láthair ag an ócáid:

• Neepa Sodhi, Oifigeach Taibhealaíon na Mumhan, Oireachtas na Gaeilge
• An Dr Caitríona Breathnach, Ionad na Gaeilge Labhartha
• Dónal Ó hÉigeartaigh, Comhordaitheoir Tríú Leibhéal , Conradh na Gaeilge
• Laoise Nic Íomhair, Oifigeach Forbartha Gaeilge, Barr na gCnoc
• Lúcás Ó Raghallaigh, Oifigeach Gaeilge agus Cultúir, Aontas na Mac Léinn COC
• Páidí Mac Gearailt, Cathaoirleach na Cuallachta
• Siún Ní Eartáin, Cumann Rince Seite, Cumann an Cheoil Thraidisiúnta

Eagraíodh na himeachtaí seo a leanas chomh maith:

• Oíche Babhlála 9 Deireadh Fómhair 2025
• Oíche Jiveála 6 Samhain 2025
• Geantraí na Nollag 19 Samhain 2025

Bronnadh na Scoláireachtaí 2025

Bronnadh Gradam na Gaeilge ar scoláire amháin agus Onóir na Gaeilge ar bheirt scoláire de chuid Choláiste na hOllscoile Corcaigh ar an 23 Aibreán 2025 ag ócáid sa Seomra Caidrimh in Áras Uí Rathaille. 

Is í Caitríona Ní Ógáin, Coireolaíocht II, a bhain Gradam na Gaeilge amach i mbliana. Bronnadh Onóir na Gaeilge ar Shiún Ní Eartáin, Ceol agus Béaloideas (BA II), agus ar Lúcás Ó Raghallaigh, BA I (Gaeilge, Béaloideas, Stair agus Polaitíocht). 

Tá na dámhachtainí urraithe ag Ionad na Gaeilge Labhartha.   

Dhein na mic léinn sárobair i gcaitheamh na bliana maidir leis an nGaeilge a chur chun cinn i dtimpeallacht na hOllscoile.  Ba iad an Dr Cian Ó Cionnfhaolaidh (Roinn na Sean-agus Meán-Ghaeilge), Máiréad Ní Loingsigh, (Roinn na Nua-Ghaeilge) agus an Dr Caitríona Breathnach (Ionad na Gaeilge Labhartha) a bhí mar mholtóirí.

Ba í an Dr Caitríona Breathnach a dhein an bronnadh ag ócáid speisialta a eagraíodh sa tSeomra Caidrimh.

Ina theannta sin, bronnadh Scoláireachtaí ar áitritheoirí Áras Uí Thuama, lóistín Gaelach na hOllscoile, ag an ócáid chéanna. Ba í An Dr Síle Ní Mhurchú, Ceann Roinn na Gaeilge, a dhein an bronnadh seo.