Conas Iarratas a Dhéanamh don MGO

Tá eolas tábhachtach ar an leathanach seo faoin bpróiseas iarratais don MGO. Tá sé tábhachtach an t-eolas go léir a léamh go cúramach lena chinntiú go dtabharfaidh tú an fhaisnéis cheart agus na doiciméid chearta chun tacú le d’iarratas. Molaimid freisin féachaint ar Leathanach an MGO sa réamheolaire chun sonraí breise ar an gclár a fháil. 

Ach na céimeanna ar an leathanach seo a leanúint, cuirfidh tú eolas ar na rudaí seo a leanas: 

• Conas an t-iarratas a chur isteach 

• Na riachtanais shonracha iontrála 

• Na doiciméid atá ag teastáil 

• Léargas ar an bpróiseas measúnaithe 

Cén áit ar féidir iarratas a dhéanamh?

Déantar gach iarratas trí UCC Apply, tairseach UCC d’iarratais ó mhic léinn.

Spriocdhátaí d’iarratais/doiciméid agus táillí iarratais d’fhómhar 2027 

• Táille iarratais – €100
• Dáta oscailte chun iarratas a chur isteach– Dé Luain an 12 Deireadh Fómhair 2026 
• Dáta deiridh chun iarratas a chur isteach – Dé Luain an 01 Márta 2027
• Dáta deiridh chun doiciméid a chur isteach – Dé hAoine an 30 Aibreán 2027
• Cinneadh maidir le hiarratais – Meitheamh 2027

*Ní ghlacfar le hiarratais dhéanacha 

Íosriachtanais Iontrála

An Roinn Oideachais (RO) a chinneann na híoschritéir iontrála ar bhonn leanúnach. Tá achoimre anseo thíos ar na critéir iontrála atá leagtha amach in Na Riachtanais Iontrála agus an Nós Imeachta don Bhliain 2026 ón Roinn Oideachais agus Óige.

Ceanglaítear ar iarratasóirí fianaise dhoiciméadach a thabhairt le taispeáint go gcomhlíonann siad na riachtanais ag (a), (b) agus (c) thíos mar a leanas.

• Scrúdú iomlán Theastas Eorpach na Gaeilge ag Leibhéal B1

Ní mór do gach iarratasóir ionchasach an scrúdú iomlán i ndáil le ceann amháin de na scrúduithe de Theastas Eorpach na Gaeilge atá liostaithe thíos a bheith curtha i gcrích acu, agus an grád iomchuí a bheith bainte amach acu, roimh an dáta deiridh le haghaidh iarratais a chur isteach chun na riachtanais iontrála a chomhlíonadh.

Ní mór d’iarratasóirí (65%+) a bhaint amach i scrúdú iomlán Theastas Eorpach na Gaeilge ag Leibhéal B1 (na comhpháirteanna cainte, cluastuisceana agus scríofa).

Nó

Ní mór d’iarratasóirí teastas bailí a bheith acu faoi láthair i scrúdú iomlán Gaeilge Theastas Eorpach na Gaeilge ag Meánleibhéal 2 (B2) nó i scrúdú iomlán Gaeilge Theastas Eorpach na Gaeilge ag Ardleibhéal (C1) (na comhpháirteanna cainte, cluastuisceana agus scríofa), tar éis dóibh grád pas nó níos airde a bhaint amach. Is  é 50% an grád pas i scrúdú B2 agus is é 60% an grád pas i scrúdú C1.

Is féidir leat clárú don scrúdú ag an nasc seo: Cláraigh do scrúdú Theastas Eorpach na Gaeilge.

Beidh toradh rathúil i scrúdú Theastas Eorpach na Gaeilge bailí ar feadh dhá bhliain sular gá an scrúdú a athdhéanamh. Ní mór d’iarratasóirí iarratas a dhéanamh ar leithligh chun tabhairt faoi scrúdú Gaeilge Theastas Eorpach na Gaeilge, atá á riar ag Lárionad na Gaeilge: Taighde, Teagasc agus Tástáil in Ollscoil Mhá Nuad. Más mian leat breathnú ar na cúrsaí atá ar fáil in UCC chun cur le do scileanna Gaeilge mar ullmhúchán don scrúdú TEG, féach anseo le do thoil.

(b) Íosriachtanais Iontrála sa Ghaeilge, sa Bhéarla agus sa Mhatamaitic.
Ceann amháin de na tacair cáilíochtaí dara leibhéal seo a leanas:

(i) Scrúdú na hArdteistiméireachta

Gaeilge: Ardleibhéal (A4) (60%<70%)

Matamaitic: A7 nó Gnáthleibhéal (G4) (30%<40% nó 60%<70%)

Béarla: A7 nó G4 (30%<40% nó 60%<70%)

(ii) Scrúduithe GCSE agus A-Leibhéal GCE i dTuaisceart Éireann: Grád C ag A-leibhéal GCE sa Ghaeilge; Grád C ag Leibhéal GCSE sa Bhéarla agus i Litríocht an Bhéarla araon nó Grád B ag Leibhéal GCSE i gceachtar díobh; agus Grád D ag Leibhéal GCSE sa Mhatamaitic Bhreise nó Grád C ag Leibhéal GCSE sa Mhatamaitic.

(c) Cáilíocht Acadúil
Ní mór na nithe seo a leanas a bheith ag iarratasóirí:

• Céim Onóracha Baitsiléara 2.2 ar a laghad (Mórdhámhachtain ag Leibhéal 8 nó níos airde ar an gCreat Náisiúnta Cáilíochtaí) lena mbaineann ualú creidiúna ECTS atá cothrom le 180 creidiúint ar a laghad, i.e. Dara hOnóracha Grád 1 ar a laghad i mbunchéim onóracha (CNC, Leibhéal 8)

Tairiscint shealadach a bheidh i ngach tairiscint iontrála i gclár na Máistreachta Gairmiúla san Oideachas (Bunoideachas) in UCC, agus beidh an tairiscint faoi réir fhíorú na faisnéise arna soláthar ag an iarratasóir agus chomhlíonadh gach coinníll tairisceana. Má fhaightear amach go bhfuil aon fhaisnéis bréagach nó neamhiomlán, coimeádann UCC an ceart iomlán aige féin an tairiscint a tharraingt siar.

Ar aon dul leis na hinstitiúidí ardoideachais eile ina gcuirtear an MGO (Bunoideachas) ar fáil, próiseas bunaithe ar phointe a bheidh sa phróiseas roghnúcháin agus dámhfar pointí de réir na gcritéar seo a leanas:

• Feidhmíocht i gCéim Onóracha Baitsiléara incháilithe ar Leibhéal 8
• Cáilíochtaí acadúla ábhartha breise (más ann dóibh)
• Taithí ghairmiúil ábhartha (más ann di)

Bíonn plé leanúnach ar siúl le príomhranna in UCC, Oifig na Staidéar Iarchéime, UCC Apply, Earcaíocht, agus Scoil an Oideachais, agus is é is aidhm leis an bplé sin tráthchláir, acmhainní agus sreafaí oibre próisis cuí a bhunú chun próiseas roghnúcháin atá idir chuíchóirithe agus éifeachtach a chinntiú.

Doiciméid Tacaíochta

Ní mór na doiciméid seo a leanas a chur isteach mar chuid den iarratas: 

• Cáipéisí TEG - dearbhú B1
• Foirmeacha tagartha maidir le taithí oibre (i gcás inarb infheidhme)  
• Ceisteanna breise don MGO 
• Tras-scríbhinní acadúla  
• Cruthúnas ar chéannacht 

Foirmeacha tagartha maidir le taithí oibre (i gcás inarb infheidhme)

Má tá taithí ghairmiúil agat a bhaineann leis na hábhair a bhfuil sé beartaithe agat iad a theagasc, nó taithí ghairmiúil ar bheith ag obair le daoine óga, is féidir Foirm Thagartha maidir le Taithí Oibre a líonadh isteach chun luach na taithí sin a aithint, agus d’fhéadfadh sé go mbronnfaí roinnt pointí breise. Is féidir leat Foirm Thagartha maidir le Taithí Oibre a íoslódáil agus a líonadh isteach agus iarr ar d’fhostóirí an fhoirm a shíniú agus stampa a chur uirthi. Mura féidir an fhoirm sin a líonadh isteach, is leor doiciméid chánach i bhfoirm ‘ráiteas dliteanas’ a chur ar fáil. Ní chuirfear san áireamh chun críoch pointí ach obair ar íocaíocht suas go dtí an 1 Nollaig i mbliain an iarratais. Féach an rannán maidir le Measúnú ar Iarratais thíos chun tuilleadh eolais a fháil ar scóráil.  

Ceisteanna breise don MGO

Cuimsítear leis an iarratas cuid ina gcuirtear ceisteanna faoi na scileanna agus faoin taithí atá agat. Beidh ort fianaise a chur ar fáil chun tacú leis na freagraí, mar déanfar athbhreithniú ar an bhfaisnéis sin le linn an phróisis measúnaithe. Tabhair faoi deara go bhféadfadh sé go ndéanfadh ráitis gan tacaíocht nó ráitis mhíchruinne difear do thoradh an iarratais.

Tras-scríbhinní acadúla

• Más iarratasóir sa bhliain deiridh den bhunchéim thú, ní mór duit ráiteas torthaí a chur ar fáil maidir leis an gcéim incháilithe ar Leibhéal 8 le haghaidh gach bliana staidéir atá críochnaithe agat go dtí seo. Ní ghlacfar ach le torthaí i bhformáid céatadáin, meán-ghrádphointe (GPA), nó meán na gcreidiúintí cáilíochta (QCA) agus sna formáid sin amháin. Ba cheart leagan bunaidh nó cóip dheimhnithe de thras-scríbhinn iomlán na dtorthaí le haghaidh GACH bliana staidéir go dtí seo (cé is moite de thréimhse Erasmus nó a coibhéis) a uaslódáil chuig UCC Apply.  
• Más céimí thú, ní mór duit do thorthaí a chur ar fáil mar mharc céatadáin foriomlán. Ba cheart leagan bunaidh nó cóip dheimhnithe de thras-scríbhinn nó de ráiteas iomlán na dtorthaí le haghaidh GACH bliana staidéir go dtí seo a uaslódáil chuig UCC Apply.  
• Déan cinnte go bhfuil an fhaisnéis ar fad a chuirtear isteach soiléir agus cruinn. Ní ghlacfar le haghaidh an mheasúnaithe ach le torthaí i bhformáid céatadáin, meán-ghrádphointe (GPA), nó meán na gcreidiúintí cáilíochta (QCA) agus sna formáid sin amháin.   
• Mura léirítear na creidiúintí ECTS go soiléir ar na tras-scríbhinní, ba cheart ráiteas ón ollscoil sin a chur isteach chun iad a dheimhniú.  
• Más mac léinn in UCC nó más céimí de chuid UCC thú, ní gá tras-scríbhinní de thorthaí UCC a uaslódáil má shonraíonn tú d’uimhir mic léinn ar an bhfoirm iarratais. Má tá dearmad déanta agat ar d’uimhir mic léinn UCC, bain úsáid as an bhFoirm Fiosrúcháin do Chéimithe chun teagmháil a dhéanamh linn.

Cruthúnas ar chéannacht

Ní mór cóip shoiléir de cheann amháin de na doiciméid seo a leanas a uaslódáil: 

• Leathanach grianghraif ó phas 
• Ceadúnas tiomána Éireannach ó NDLS 
• Teastas breithe 
• Más mac léinn in UCC nó más céimí de chuid UCC thú, ní gá cruthúnas ar chéannacht a uaslódáil má shonraíonn tú d’uimhir mic léinn ar an bhfoirm iarratais.

Próiseas Iontrála

Cuirfear agallaimh ar bun i Mí na Bealtaine agus seolfar tairiscintí ina dhiaidh sin.

Is iad seo a leanas na critéir roghnúcháin le haghaidh iarrthóirí a chuirfear faoi agallamh:

• Oiriúnacht don teagasc (20%)
• inspreagadh (15%)
• scileanna idirphearsanta (20%)
• cumas cumarsáide (20%)
• buanna agus inniúlachtaí iomchuí (10%)
• fianaise ar cheannaireacht agus ar thionscnamh (10%)
• agus taithí ábhartha (5%).

Tairiscintí

Déanfar tairiscintí i Mí an Mheithimh 2027 do mhic léinn a thosóidh san fhómhar. Daoine a dtabharfar tairiscint dóibh, gheobhaidh siad ríomhphost ina n-iarrfar orthu stádas a n-iarratais a sheiceáil agus ina dtabharfar sonraí ar an tairiscint. An seoladh ríomhphoist a luaigh tú san iarratas ar líne, déan cinnte go bhfuil sé cruinn agus go bhfuil teacht agat air. I gcás ina bhfaighfeá tairiscint, ba cheart logáil isteach ar UCC Apply chun a dheimhniú go nglacann tú leis an tairiscint faoin dáta atá sonraithe chun d’áit a chur in áirithe. 

Tús an Chláir

Cuirfear tús leis an gclár sa tríú seachtain de mhí Lúnasa nuair a chuirfear tús leis an Socrúchán Scoile MGO1 (socrúchán riachtanach), tráth a osclófar na hiar-bhunscoileanna áitiúla atá páirteach sa chlár. Cuirfear na dátaí in iúl do na hiarratasóirí a n-éireoidh leo, agus braithfidh na dátaí sin ar an gcéad lá den téarma sa scoil ina mbeidh tú. Cuirfear tús le léachtaí agus le ranganna teagaisc an MGO in UCC sa chéad seachtain de mhí Mheán Fómhair.