]> Gach éan mar a adhbha An electronic edition Tadhg Mór Ó hUiginn Electronic edition compiled and proof-read by Margaret Lantry University College Cork. Professor Marianne McDonald via the CURIA Project. Second draft. 1702 CELT: Corpus of Electronic Texts: a project of University College Cork.
College Road, Cork, Ireland—http://www.ucc.ie/celt
1997 2008 CELT online at University College, Cork, Ireland. G402121

Available with prior consent of the CELT programme for purposes of academic research and teaching only.

 Manuscript source Dublin, Royal Irish Academy, MS 137, 34 (alias 23 N 28: see Catalogue of Irish Manuscripts in the Royal Irish Academy, fasc. 4). Dublin, Royal Irish Academy, MS 1080, 94 (alias B iv 2: see Catalogue of Irish Manuscripts in the Royal Irish Academy, fasc. 24). The edition used in the digital edition Láimhbheartach Mac Cionnaith "Gach éan mar a adhbha" Dioghluim Dána Láimhbheartach Mac Cionnaith Dublin Oifig an tSoláthair [Government Publication Office] 1938 325–330

CELT: Corpus of Electronic Texts

All the editorial text with the corrections of the editor has been retained. Variant readings and editorial annotations have not been reproduced in this edition. Variants may be entered in a future edition.

Text has been checked, proof-read and parsed using NSGMLS.

The electronic text represents the edited text. Compound words have not been hyphenated after CELT practice.

Quotation marks are temporarily retained.

The editorial practice of the hard-copy editor has been retained.

div0=the whole text. Metrical lines and quatrains are marked and numbered.

Names of persons (given names), and places are not tagged. Terms for cultural and social roles are not tagged.

The n attribute of each text in this corpus carries a unique identifying number for the whole text.

The title of the text is held as the first head element within each text.

div0 is reserved for the text (whether in one volume or many).

The numbered quatrains provide a canonical reference.

 By Tadhg Mór Ó hUiginn, an Irish bardic poet c.1200–1600 The text is in Classical Modern Irish. bardic poetry 2010-11-11 Beatrix Färber ed. New wordcount made. 2008-10-15 Beatrix Färber ed. Header modified; keywords added; file validated. 2005-08-25 Julianne Nyhan ed. Normalised language codes and edited langUsage for XML conversion 2005-08-04T16:10:15+0100 Peter Flynn ed. Converted to XML 1997-08-25 Margaret Lantry ed. Text parsed using NSGMLS. 1997-05-28 Margaret Lantry ed. Header constructed, structural mark-up entered and checked. Lineation checked and verified. 1995-96 School of Celtic Studies (Dublin Institute for Advanced Studies) ed. Text captured by scanning and proofed. Gach éan mar a adhbha

TADHG MÓR Ó hUIGINN cct.

 "Gach éan mar a adhbha" oirrdhearc so is 's sé leantar; gach ealta mar oiltear; ní chleachtfa achd a cleachtadh. Lachain i laoibh sneachta ag snámh eighridh uaine, ní fearr leo lá gréine as teo ná an chlá as cruaidhe. Eoin íochtair na fairrge dá nach foghnann faidfhéar bíd choidhche gan chadódh gach n-oidhche fan aigéan. Éadána eoin mara ar muigh nach múr trágha; eoin moighe ná móna ar doire ní dána. Eoin coilleadh ní cleachtaid cuaird ar muigh ná ar maighshléib; nochan fhaghbhaid dh'anbhuain nach adhraid don aimhréidh. Beathadhaigh an bheatha mar bhíd eoin na n-ealtadh, gion gob dh'aonchrúdh oiltear, gan claochlúdh do chleachtadh. Cách fa a gcleachtadh bhunaidh, bláth dearcan tre dharaigh, fir fa cháil a gcionaidh is dáibh sin a samhail. Gach macaomh mar mhúintear; Maghnus maith do múnadh, slat Breagh, Brian na nGaoidheal, mac mar Niall geal Glúndub. Maith do múineadh Maghnus mac Conchobhair Carna; gidh tréan nocha toghdha; gach éan mar a adhbha. Maghnus mar do múineadh cá Gall glas ó ngéabadh? sé ag dul tar gach ndúnadh Lugh é is ní hé a éanar. Lugh é is Cú na Cearda —gach cleas 'gá chúl chraob- hach— ainm dó im gach mbuaidh Buadhach i ngach uair bhus aonach. Gach buaidh as bhuaidh aonaigh fhuair 's ní fhuair gan iarraidh; sleagh re sdargha sduadhaigh, fear Falgha, fear fiadhaigh. Fear feithmhe gach fhásaigh, fear catha agus comhluinn, badhbh gheal go ngroigh sheangdhuinn, fear 'ga bhfuil gach foghluim. Oide múinte Maghnuis maith ar chách a chomaoin; tug druim re gach ndobhuaidh Ó Chuinn gion go gcommaoidh. Do mhúin féin dó dochar, do dhruid é i ngach ionadh; níor mhúin ón ló as leanabh dó achd a shúil re shiobhal. Do mhúin trá dá throighidh théid i n-ágh re n-ógaibh ag breith cruidh gach chóigidh fuil do bheith 'n-a bhrógaibh. Do mhúin dá ghlún ghealchorr ghabhas beirn re biodhbhaidh a fhilleadh go harnaidh re himeall i n-iomghuin. Do mhúin múnadh éagcóir dá ucht réidh go riarthair bheith i gcomhdháil chaomhthaigh re corrgháibh i gcliathchaibh. Do mhúin béas dá bhrághaid —béas aice as ord cagaidh— gan ní uimpe idir achd muince go madain. Níor mhúin at achd iarainn, nó at cotún craobhach ón cam gach craobh líneach 'n-a bharr as caomh caolach. Do mhúin bheith ag bogadh fan gcleith nó fan gcloidheamh bas choirrgheal an churadh re toirneamh na dtroigheadh. Do mhúin meadhón oidhche onchú an earla ghlúinigh loighe i ndoire dhiamhair 's gan loighe achd 'n-a lúirigh. Olc d'fhulang ga fhoghluim is eadh dhligheas deighfhear; fear céadmhaoidhte curadh ní héagcaointe a eidhear; tig 'n-a thuile a thoradh do dhuine fa dheireadh. Ní tearc toradh iongnadh aige d'éis a fhorbhaidh do shról dhearg, do dhoinnmhil, don ór ceard i gcornaibh. D'fheoil, do lionn, do luachair, do thuathaibh fa threabhaibh, do dhíon bó, do bhroghaibh d'fhíon is an ló leabhair. D'éadach agus dh'eochaibh, is dh'éideadh mar fhaghlus, dh'arm go n-ór, is dh'ionnmhus, dhiongbhus Mór do Mhaghnus. Maghnus mhullaigh Tailltean troid ris is réim anáigh; gar don rígh ó roBhóinn tír nar ghabh do ghabháil; maith dá bhfuair ní furáil do fhlaith ar n-uair d'fhagháil. Rí gaisgidheach nGaoidheal gorm a chloidheamh crosghlan; rí na n-each a each-san do-ní an chreach do chosnamh. Ní héagcosmhail aigneadh dá eoch 's d'fhior a druimne; lán Éire dá n-inmhe; re chéile isad cuibhdhe. Each geal, gruagach doinnfhionn, dias a-tá ar tí fuadaigh; creach fhear is each n-éididh re n-each ngeal an ghruagaigh. Gruagach go méad míleadh do-éid ar gach n-aoinfhear; each gráineamhail gléigheal re ngáidhfhearaibh Gaoidheal. Manannán an mharcshluaigh, Maghnus Muighe Muaidhe fear eich sheinggil shídhe agus eirridh uaine. Níor chumhga neart námhad ní do-san ná di-se; Dia deisiol na deise ei-sion agus i-se. Is í an Liath Mhór Macha, mór n-anbhuain ro fhuluing; tug sei-sean bú a Boirinn is ei-sean Cú Culuinn. Is i-se an t-eac oirrdhearc, Each geal Taidhg ghloin ghraifnigh; ó a cholg thei-sean teithtir; Tadhg ei-sean nó a aithghin. Is i-se an Liath luirgneach lingeas cách i gcathaibh; sei-sion mhac Maoil Mhithigh as phrap re taoibh tachair. Si-se re sluagh nGaoidheal Gob na Sgéal sgeamh sholamh; sei-sean Murchadh Mumhan nach tomhthar do thomhadh. Sei-sean Síoda Odhar dar bh'aithnidh gach aonach; si-se leath re Lámhach a each achd nach aondath. An Blár Aodháin i-se agus Aodhán ei-sean; léigthe an magh dhí is do-san dá rabh sí agus sei-sean. Sei-sean Lugh lá an tachair ler thuit fine Fomhra; triall teithidh ní tarbha ris an mbeithir mbodhbhdha fa fhonn Mhuighe Meadhbha ar Dhonn groidhe Garmhna. Conall Cúigidh Chonnacht chosnas Magh n-Aoi n-armghlas; is cathaighe coimhdheas fan machaire Maghnus. Maghnus mhullaigh Cruachan croidhe brodla bághach; doirbh fa mhúr Sainbh srianach sbairn re lúdh 's re lámhach; re ghleic ní ghabh lúireach fa Mhagh mhac meic Mághach. Gach.