Anno Domini mcccxx.
Temporibus Johannis Pape xxii. et Domini Edwardi, filii Regis Edwardi, qui Edwardus post adventum Sancti Augustini in Angliam vicesimus quintus Rex fuerat, necnon sub Alexandro Byckenore, tunc Archiepiscopo Dublin, dicte civitatis Dublinensis Universitas incepit.
Primus Magister in eadem Universitate fit Frater Willelmus de Hardits, Ordinis Praedicatorum, qui Willelmus sub dicto Archiepiscopo in sacra theologia solempniter incepit.
Secundus Magister in eadem facultate fit Frater Henricus Cogry, Ordinis Minorum.
Tertius magister fit Willelmus de Rodyard, Decanus Dublin ecclesie cathedralis Sancti Patricii, qui in jure canonico solempniter incepit. Iste fit primus Cancellarius dicte Universitatis.
Quartus magister in sacra theologia fit Frater Edmundus de Kermerdyn.
Item, Rogerus de Mortuomari, Justiciarius Hibernie, ad Angliam est reversus, Domino Thoma Filio Johannis, tunc Comite Kyldarie in loco suo dimisso.
Item, Dominus Edmundus de Pincerna Angliam intravit, et inde ad Sanctum Jacobum accessit.
Item, pons ville de Leghelyn construitur per Magistrum Mauricium Jak, Canonicum ecclesie cathedralis Kyldarie.