Anno Domini mcc. nonagesimo quinto.
Edwardus, Rex Anglie, edificavit castrum de Bello Marisco, id est, Beuemaris in Venedocia, que mater Cambrie vocatur, et a vulgo Anglesia, eam intrando cito post Pascha, et Venodotes, id est, homines valentes Anglesie, suo imperio subjugando et cito post istam tempestatem, videlicet, circa festum Beate Margarete, Madocus, tunc temporis Wallie electus, gratie Regis se supponens, per Dominum Johannem de Haverynges London est adductus, et ibidem in turri inclusus, gratiam et benevolentiam Regis expectando.
Isto anno, obiit Dominus Willelmus Duddyngzele, Justitiarius Hibernie, in crastino Sancte Marie Egiptiace. Cui successit Dominus Thomas, filius Mauritii, in Justitiaria.
Item, circa eandem tempestatem, Hibernici Lagenienses Lageniam vastaverunt, Novum Castrum, cum aliis villis, comburendo.
Item, Thomas de Torbevile, seductor Regis et regni, convictus trahitur per medium London, super pellem prostratus vallatusque quatuor tortoribus larvatis, improperantibus ei convicia, et sic ultimo patibulo affigitur ut sepulture non daretur corpus ejus, milvis et corvis exequias celebrantibus. Fuit iste Thomas unus eorum qui, in obsidione castri de Rions capti, Parisiis ducebantur. Qui locutus est ad Principes Francorum quod illis Regem Anglie traderet. Relinquens ibi duos filios obsides, rediit de partibus transmarinis, et Regi Anglie et suo Consilio se junxit, enarrans omnibus quod caute evasit de carcere, et cum de consilio Regis et ordinatione regni certificaretur, omnia in scriptis redigens, Preposito Parisiensi
Item, circa eandem tempestatem Scoti, rupto pacis vinculo quod cum ligeo Domino Rege Anglie pepigerant, cum Rege Francie novum foedus inierunt, et, conspiratione facta, in Regem proprium eorum, Dominum Johannem Baillol, insurrexerunt, et eum in quodam castro altis montibus circumsepto in interiora loca Scocie incluserunt. Elegerunt sibi, more Francie, duodecim pares, videlicet, quatuor Episcopos, quatuor Comites, et quatuor proceres, quorum nutu cuncta regni negotia censerentur. Et hoc factum est in ignominiam Regis Anglie, quia, reclamantibus Scotis, dictus Johannes per Regem Anglie eis preficebatur.
Item, Rex Anglie iterum versus Scotiam, in Quadragesima sequente, ducit exercitum ad temerariam arrogantiam et presumptionem Scotorum degenerum in patrem et Regem proprium compescendam.
Item, Dominus Johannes Wogan factus est Justiciarius Hibernie, Domino Thoma, filio Mauricii, cedente eidem.
Item, idem Dominus Johannes Wogan, Justiciarius Hibernie, fecit pacem inter Comitem Ultonie et Johannem Filium Thome, et Geraldinos, per biennium duraturam, ac inducias.
Item, his diebus, circa Nativitatem Domini, Dominus Gilbertus de Clare, Comes Glovernie, diem clausit extremum.
Item, Rex Anglie mittit Edmundum, fratrem suum, cum exercitu, in Vasconiam.