iss ed ainm inna sesside dúailche marbas anmain duine. Atát dá gné forsan dúalig-se .i. dogailse domando co n-derchóiniud & aimiris, dogailse déoda co n-déeirc & cáin-iris. Indalana imfolgnai bithfháilte i m-bithbetha for nim, araile immefolngai bithbrón i m-bithpíanaib inferno. h-Iss í didu in dogailse imfolgnæ faoilte na h-anmæ for nim inní bís tria chói pectha co n-iris dílguda & indí bís tria airchisecht caich triúin & cech trúaigh & caich coimnessaim bís ar obur pecthæ & dúalchæ & co tuit i n-doescaire & i tróigi cen iris cen aithrige. Ar antíi conessa a pecthæ fadeisin & pecthæ a coimnesaim bíd fáilid side la Día for nim. Is de as-beir Críst1: Beati qui lugent nunc2 quoniam ipsi consulabuntur’’
Matt. 5:5
In dogailse domunda immorro, atát trí gné for suidiu .i. dogailse & brón scartha frisna cardiu calnaide ar ingnáis a dóennachta & ar a seirc & ar a n-inmaine, nó fobithin etarscartha fria a máine & a feba talmandai, nó fobithin etarscartha fria col & pecath & a tola calnaidi. Is ed dano an gné tánaise inna dogailse domundai .i. brón & derchóiniuth di cech accobar at-cobra duine cen a orba acht tol Dé namá.
Is ed3 dano in tres gné ina {column 40b1} dogailse domundae, brón & dércháined di cech feib fogaib duine ar homun a foxail airi & a erchra & ar omun scartha fria cith iarmaul conna co m-bí cen brón & dogailse ceín bas m-beó, co téit íarum ar ceann m-bithbróin dochum péine suthaine cen forcend.
Is h-í tra cland & geneluch gainethar ón dogailse domundai .i. serbai co n-inire, anseirce co n-écmailte, cruine co foichlighe, rolabrai co tói, forlúaman easpæ cen taiscithe, anbsaide aicnith, utmaille chuirp, foindletha menman fri cech dæscair im tinnscetal
h-It é tra frepthai inna dogailse domundai .i. fáilte spiraltai co roithinche cride & menman fria dogailse n-domunda, grescha ernaigthe co n-áine & frithaire fri toifliun & cotaltaige, easlabra co l-leth menman im Día fri tercmenmain, mod airchiund di lubair & ernaigthe fri forlúamain n-esbæ, h-ires co n-gním, fáilte co n-áilgine fri dercháiniuth & inire menman.