Araili1 duine trúag bocht doruacht docum Dúaid ríg do cuinnchid almsuine fair. Is ann sin tairnic la D. a almsanu do fhogail co nar facbad aige ní do-berad don bocht do cinel bidh na h-innmhusa [...] amra la D. esein & is ed is-pert: ‘Marbthair in duine etci bocht ud!’ ol sé. ‘Ac!’ ol Solam. ‘Is ferr a dul cen ní oldas a marbad ina cend’. Is-pert in duine etci fri D. ‘Taile do bennachtain dam a n-ucht mo luimne noco rucar lem dom tigh o nach fagba almsa eli dam.’ Do-beir umorro2 D. a bennachtain do-sam fo chedoir a n-ucht a luimne. Ro-timsaig in duine etci umorro a ucht immon m-bennachtain co ro-acht dia thig. Bai umorro a eri fein innti, bui dia [...] a con-decid dia mnái. ‘Bec tarba co se in turus da-cuadais’, ol in ben. La sodain beris leis a lumain dia nighe docum tobair bai ina garrda. In tan tairnic do-sum a nighe ba lan in tobar do iasc & gabais moran don iasc & recuis co m-ba saidbir. Rocuir a lumain dia tirmugud for abuill bói ina gharda. Ba h-or in aball umorro asa h-aithle co m-bai fo ubhlaib cubruib. Acht ata ni cena, ro-fhorbratar tri h-ubla oir for barr na h-abla iths. Beris in duine etci na h-ubla sin & ní don iasc co h-airm a m-bai D. & do innis in sgel sin do uili. ‘Is ferr inas do marbadh’, ol Solam, ‘amail rotriallad.’ Rondais D. na h-ubla .i. uball do fein & uball do t-Solum & uball don t-i ros-fuc leis, conad aire sin nach dlegar cunntabairt co rab amra iarsma na m-bennacht &c.