Corpus of Electronic Texts Edition
Lives of the Saints from the Book of Lismore (Author: Unknown)

Life 5


2503]

Betha Fhindein Clúana h-Eraird


2504] AT-FIADAR DIDIU A CUMAIR FERTA & MIRBUILI in craibhdhigh-seo & in
2505] forbhadh do-rat for a rith m-buadha i bhos isin bith frecnairc: at-fiadhar
2506] sin ar airfited anma na n-irisech .i. Findian mac Findtain, meic Conchraid,
2507] meic Dairchealla, meic Senaigh, meic Diarmada,{folio 65va} meic Aedha,
2508] meic Fherghusa, meic Aililla Taulduibh, meic Cealtchair, meic Uithechuir.
2509] In Findtan-sin, didiu, do-ráidh-sem, tuc-side setig socenelaig, Teluch a
2510] h-ainm-side. Do-rala cu m-ba alachta isidhe uadha-som. A n- aimsir a
2511] h-imtruma co tarfas dí araili lasair theined do dul ina beola & a tiachtain
2512] a n-deilb eoin edrochta for cula for in conuir cetna, dula don eon co n-essidh
2513] for barr crainn, eoin & enluithi Leithi Mogha do thiachtain cuigi isin
2514] crainn-sin co n-asta uile aca-som, a tiachtain in eoin i l-Leith Cuinn co
2515] n-eissed ann-sidhe for barr chroinn ele. Eoin & énluithe Eirenn do
2516] thiachtain cuice cu ros-fhasta ocai. At-cuaidh didiu in aislingi-sin dia
2517] céli. ‘Coimpert craibhdhech eicin fil ocut’, ar se. ‘Scaram coimleapuid
2518] cein bhia-sa fon n-indus-sin’. Do-ronsat amhlaid. Ni chaitheadh didiu
2519] Teluch fésin biadha inmarra acht luibhe ailghena & airera etroma, cu
2520] ro genair in ghein buadha sin.


2521] Rugad iarum inti noeim Finden cu h-Abban mac h- úi Chormeic cu ro m-baist.
2522] Batar didiu dá thopar isin mag in ro baisted-somh, Bal & Dimbal a
2523] n-anmanna. As an topur dia n-ainm Bal ro baisted-som amail ba cubaidh dia
2524] airilliudh. O ro forbair intí noeimh Fhinden rucad co h-espoc, cu Fortchernn,
2525] cu ro legh salma & in t-ord n-ecclasda occa. Ro fhothaig-siumh immorro tri
2526] h-ecalsa asa ghillacht .i. Ros Cuire & Druim Fiaid & Magh n-Glas.


2527] O ra-siact immorro co h-aes trichtaighi luidh tar muir. Taraill co Tairinis.
2528] Fuair senoir ara cind innti, Caemhan a ainm. Batar seal immalle & do-ronsat
2529] aentaid. Luid Finden iar sin cu Cill Muine. Fuair tri suithe ara cind annsin
2530] .i. Dabid & Gillas & Cathmael a n-anmanna. Rob e fath a comthinoil
2531] annsin, cosnum cennachta & apdaine innsi Bretan etir dís díbh .i. etir
2532] Dabid & Gillas. Do bretheamh choitcenn ro aentuighseatt eatarra Cathmhael.

p.76


2533] O 't-connaic immorro Cathmhael noemh Finden ro fhegh co h-innfheithmech:{folio 65vb}
2534] ‘Cia h-innithemh romhor’, ar Daibhith fria Catmael, ‘do-beri forsan
2535] oclach n-anaithnid do-dechaid isin tech’? ‘Rath mor’, ar Cathmhael, ‘airighim
2536] air’. ‘Ma ata’, ar Daibhith, ‘rath fair, labradh innousa as in bérla
2537] Bretnach et etercertad in caingin ima taím-ne’. Do-rat Finden airrdhe na
2538] croiche tara ghin, & ro labair as in m-Bretnais amail bhud h-é a berla bunaid,
2539] et do-rat an indse do Daibid ar senserecht.


2540] Luidh iar sin Finden & Cathmhael & Daibid & Gillas d' agalduim righ
2541] Breatan do chuinghidh inaidh reclesa fair. At-bert saidhe ná raibe oga.
2542] At-bert co h-essomain immorro araili duine istigh: ‘Madh ail’, ar se, ‘dona
2543] clerchib, cuiret ass in loch mor-sa imuich a toebh in dúine & denat recles
2544] doibh 'na inat’. ‘Dia n-dernat-somh sin’, ol in ri, ‘rot-biat cidh an dunad-sa
2545] la toebh inaidh in locha’. Luidh Finden immorro & aithinne 'na láimh co
2546] rathum isin loch, cu ro theich roime isin muir: cu ro morad ainm De &
2547] Finnein triasin moir-mirbuil-sin. Ro h- edpartha tra na feranna-sin do Dia &
2548] d' Fhinnian. Do-rat-sidhe iat dona sruithibh Bretnachaib batar malle fris.
2549] Ro fothaiged tri cathracha ocu-side inntib. As dib-sidhe Lann Gharban no
2550] Gabran aniu. Bui immorro Finden .xxx. bliadne oc foglaim immalle frisna
2551] sruithibh Breatnachuibh batar malle fris.


2552] LAA n-aen ann lotar manuigh isin caillid do bhuain chrann 'chum
2553] ecalsa. Ni ro leicset Finden leo ar chadhus dó. Tainic in secnap tara n-eis
2554] co Findén, co n-ebert friss: ‘Cidh ro m-bai’, or se, ‘ná dechadais isin caillid’?
2555] ‘Cidh o chianaibh’, ar Finnén, ‘at-berthea frind no raghmais: in tan dano
2556] at-berur frind no ragam acht fo-gabhur a comadhbhur dhún’. ‘Atat’, or in
2557] secnap, ‘dá óg-dhamh amuigh isind achad; timairc-si lat iat & eirg isin caillid’.
2558] Luidh Finnén leo isan caillid, & ba h-e feidhm toisech do-riacht an eclais a
2559] fheidhm. Ni fes immorro dil in t-secnap rota-cursaigh-seom. Ro morad
2560] ainm Dé & Findéin tresin moir-mirbuil sin.


2561] FEACHTUS tancatar Saxain d' innarba no d' innred Bretnach.{folio 66ra}
2562] Ro gabhsat longphort i taebh shleibhi aird. Do-chuatar Bretain i muinighin
2563] Findein im chuinghidh osaidh doibh o Shaxanchaib. Luidh Findén forsin
2564] n-umuloit. Do-ratsat Sachsain era fair. Do-rat Finen buille dia bachaill
2565] isin sliabh, cu torchuir in sliabh for Saxanchaib, cu na térno fer indisdi scel
2566] dibh.


2567] TAINIC iar sin tocra do Fhinnen dula do Róimh iar forbhadh a fhoglama.

p.77


2568] Tainic aingel Dé chuigi co n- ebert fris: ‘A n-do-bertha dhuit icc Roim’, ol
2569] sé, ‘do-berthar i bhos. Eirg & athnuidhig iris & creidium a n-Eirinn tar eis
2570] Patraic’. Do-dhechaidh iarum Finnén do thoil De dochum n-Eirenn.
2571] Luidh Muiredach mac Aenghusa ri Laigen dochum puirt ana frithshet co n-do-fhuc
2572] for a mhuin a tri h-uidedaib tar na tri h-achdu roptar nesa don phurt.
2573] Ann-side at-bert fer do mhuinntir in righ: ‘Is tromdai atai, a cleirig, forsin
2574] righ’. ‘Easpach sin’, ar Finnén, ‘ár in lín fechtus nom- gebhudh-sa for a
2575] mhuin no bhiath in lín righ sin for an cuicid dia shil. Uair as fo tri dano’, ar
2576] se, ‘nom-gabh, gebuit tri rig dia shil coiced Laigen’. Ro bennach Finnén
2577] iar sin Muiredach bhadein, & at- bert: ‘Amail fuair’, ar se, ‘mogh De faeilti
2578] ocut, cu bh-faghbhu-sa faeilti ac muinntir nimhe i Tír na m-Beo’. Ro bennach
2579] dano broind a sheitche co ruc-side mac sainemail, Eochu a ainm .i. athair
2580] Branduibh iar sin. At-bert in ri re Finden: ‘Gebe inad’, ar sé, ‘i Laighnib
2581] bus maith lat do-berthar dhuit do dhenam do reclessa’. Tainic aingel Dé
2582] ria bh-Finnen cusan sliabh danad ainm Condal. Ro imchuirset aingil Dé h-é
2583] cona mhuindtir i n-adhaigh-sin do mhullach in t-slébi isin glinn ba nesa dhó.
2584] At-bert-somh isin maduin ria muintir techt isin caillid do bhuáin crand do
2585] cumhdach reclesa. Do-dhechaid aen dibh cuici-sium ar cula, & geg do abhuill
2586] cona torad 'na láimh. Luidh-siumh amalle fris-side cusan inadh i m-bai in
2587] abhall. ‘Dentar’, ar essium, ‘in recles isunna’. Dia m-batar forsna briathraib-sin
2588] co n-fhaccatar chuca Bresal mac Muiredaig & Cremhthann espoc a
2589] bhrathair. Luid Breasal co ra ghaibh{folio 66rb} co slatra laimh in
2590] cléirig do deoin in espuic. Feargaighter iarum in clérech, co n-debairt: ‘In
2591] lámh’, ar se, ‘ro sinedh do dlomad dam-sa, resiu dorua in trath so imarach
2592] ind ingnibh seabaic, cu ro fuirmidter am fhiadhnaisi. In t- espoc dano dia
2593] n-dernadh deoin, ní ba h-ard a congbhail isna talmandaibh, & ni festar cidh
2594] inadh a eiseirghi’. Tangatar immorro Osraighi for creich isin tír 'arnamharach.
2595] Luidh Bresal dia fuapairt, cu ro marbad and, cu tucad lasin seabac
2596] a lamh, co rus-fuirim i bh-fiadhnuse Findéin, cu ro mórad ainm De & Finnein
2597] don mhóir-mhirbuil-sin.


2598] TAINIC iar sin Muiredach athair Bresail, gu tard do Finnén in magh as
2599] radlomh Bresal dó. Ro leasaiged lais- sium, conad h-e Achadh Abhall aníu.
2600] Bai-sium .ui. bliadni dec isin inad-sin oc foghnum don Coimdid na n-dula,
2601] co n-debert an t-aingel fris: ‘Ni h-é so inadh h' eiseirghi’, ar se. ‘Bid h-e

p.78


2602] cena inadh do comdhala riat mhanchuibh i l-lo bratha’: conudh desin ita Sliabh
2603] Condala .i. sliab comdhala Finnein ria manchaib i l-lo bratha.


2604] Ceileabhraidh Finnén iar sin dia mhanchaib & tainic i crich h-Ua
2605] n-Dunlainge. IS ann-sidhe ro edhbair in ri Coirpri Mugna Salcain do-sum.
2606] Bui-sium se bliadni ann-sidhe. Tainic iar sin co h-Achad Fhiacla: ann-side do-rochair
2607] fiacal as a cind-som, cu ro fholaig i muine dresa. Ic tiachtain
2608] doibh-sium iar sin as cun-aitchetar na braithre uadh afhiacuilcomurtha d' facbhail
2609] acu, cu n-debairt-seomh friu: ‘Eirgidh’, ar se, ‘cusin muine n-dreasa út
2610] at-ciche, & tucaidh as in fhiacuil for-facbhas-sa ann’. Do-thiaghat iarum &
2611] fuaratur in muine ar lasad, & tucsat in fiacuil leo, & is uaithi ro h-ainmniged
2612] in baile .i. Achadh Fiacla.


2613] TAINIC iar sin Finnen cu Cill Dara co Brighit, cu m-bui ic tiachtuin leiginn
2614] & proicepta fri re. Ceilebrais iar sin do Brigit, & do-breth Brighit fainne oir
2615] dho. Nir' bho santach-som imon saegul. Ni ro ghabh in fainne. ‘Ce no
2616] optha’, ar Brigit, ‘ro-ricfea a leas’. Tainic Finnen iar sin cu Fotharta
2617] Airbrech. Do-rala uisce do. Ro innail a lamha as in usqui:{folio 66va} tuc
2618] lais for a bhais as an uisqui in fáinne targaidh Brighit dó. Táinic iar sin
2619] Caisin mac Nemain co faeilti moir fri Finden, & ro n-eadhbair fein
2620] dó, et ro acain fris rí Fotharta ic cuinghidh oir fair ara shaeire. ‘Cia
2621] mét’, ar Findén, ‘connaigheas’? ‘No ghebhudh uingi n-oir’, ar Caisin.
2622] Ro thomhuis sé iar sin in fainne, & frith uingi oir ann. Do-rat Caisin h-i ar
2623] a shaeiri.


2624] TAINIC Findén iar sin tar Bóinn co h-Eiscir m-Branain, ait ita Ard Relec
2625] iníu. Ro fothaig eclais isin maigin-sin. Tainic duine etrocar chuigi-sium,
2626] Baeth a ainm. At-bert frisin cléirech na bíat isin maighin-sin. Ro berthea
2627] a rosc uadha achedoir. Do-roine aithrigi iar sin & tucad dó arís a shúili.


2628] Crech do-dhechaid an inbhaid-sin a Feruibh Tulach sech recles an
2629] cleirig, co tarla d' áraile gilla don creich cu n-dechaid i sorn na h-atha bui i
2630] focus in reclesa. Ro faillsiged do Finnén inní-sin. Luid-side & aidhme in
2631] berrtha leis, cu ro coronaighedh aca in duine-sin fon n-ecosc n- eclasda, cu
2632] ro légh ac Finnén, co tart gradha fair iarumh, conad h-e espoc Senaigh .i.
2633] cetna comharba ro ghabh iar Finnén.


2634] FEACTUS d' Finnen oc glanad thiprat oice. Tainic aingeal cuigi co n-ebairt:
2635] ‘Ni h-e so inad na tiprat’. ‘(Do)-beruinn’, ar Finnén, ‘gusan inad a n-dlegur.

p.79


2636] Luidh in t-aingel roim Finnén seal soir on eclais gu ro foillsigh dhó inadh
2637] na tipraiti’. ‘A mo coimdhi’, ar Findén, ‘in saethar-sa do-ronsam-ne o
2638] chianuibh cidh bias de’? ‘Cibe tara ragha in uir ro claidhis’, ar an t-aingel,
2639] ‘do-geba trocaire on Coimdhid’.


2640] TANCATAR iar sin noéimh Eirenn cuca-som as gach aird d' foghlaim eccna
2641] oca, cu m-batar tri mile do naemuib imalle fris, conad dibh-sidhe ro thogh-sum
2642] na da aird-espoc dec na h-Eirenn, amail do-fhindat ind eolaigh. Ocus
2643] at-fiadhat ind eolaig & na scribenna conna dechaid nech dona tri mhile-sin
2644] uadha-som cen bhachail no soiscél no comartha suaichnidh eiccin,
2645] cunadh impaibh-sin ro gabsat a reclesa & a cathracha iardain.


2646] FEACHTUS ro faidh-sium a dhalta .i. espoc Senaigh, do taiscelad for lucht
2647] a scoile dus cidh do-ghnítis. Ba sain, tra, an ní ica bh-faghbhaithe cach
2648] dibh, acht battís maithe uile. Frith, tra, Colum mac Crimhthain & a lama
2649] a sinedh{folio 66vb} úadh, & a menma indithmheach a n-Dia, & eoin oc
2650] tairisium for a lamhu & for a cenn. O 't-cuas do Fhinnen inní-sin at-bert:
2651] ‘Lámha ind fhir-sin’, ar se, ‘do-bera comunn & sarcarbhaic dam-sa frisna
2652] déidhenchu’.


2653] TAINIC aingel De co Finnén co n- ebairt fris: ‘Ni h-e so inad th' eiseirghe,
2654] ár biaidh duine maith dot muindtir i sund’. Tainic aingel co Findén,
2655] cu Ros Findchuill, is eisidhe Les in Memra inniu. Ann sein gabhus Finnén
2656] in fersa fathachda, Hec requies mea. Annsin tainic Fraechan drui a docum-som.
2657] Ro fhiarfocht-sum: ‘In ó Dia’, ar se, ‘ata dhait-si in fis fil ocut’? ‘A
2658] fhromhudh duit-si’, or Fraechan. ‘Abair cetamus’, ar Findén, ‘inadh mo
2659] eiseirghi-sea. At-cim a nimh & ni fhaicim i talmain’. At-racht Finnén. ‘In
2660] t-inad asa n-errachtair innósa’, or Fraechan, ‘is as ad-reis do mór-dhail bratha’.


2661] TANCATAR iar sin a dha shiair co Finnén .i. Righnach & Richenn, & a
2662] mathair .i. mathair Ciarain, cu ra gaibhset i Cill Righnaigi. Luid Finnén &
2663] Ciaran dia torruma. Batar na caillecha oc acaine beith cen usce. ‘A choimdhe’,
2664] ar Finnén fria Ciaran, ‘cait i bh-fhuighbhium uisqui doibh sut’? ‘IN budh
2665] leasc lat-sa’, or Ciaran, ‘eirghi as an inad i tai’? At-ract Finnén. ‘An t-inadh
2666] asa r' eirghis’, ar Finnén, ‘as é inadh na tiprat’. Ro fhiarfocht Finnén do Righnaigh
2667] cindus bai in chaillech a máthair. ‘Ni cumangar ced n-d(ul) i n- aicsighudh
2668] di ar tromdhacht a h-anala’. Ro imderg cu mor imon cleirech & at-bert-somh:

p.80


2669] ‘In Coimdhe’, ar se, ‘airchesas cech aen don chinedh daena dia h-airchisect’!
2670] Luidh Righnach iar sin dia taigh. Fuair a máthair n-óghshlain la breitir
2671] in noeim.


2672] Molad thuc Geman maighister fechtus donti noimh Fhinden, iarna
2673] dhenum tria rithimm. ‘Ni h-ór tra, ná airget, ná étach loghmar’, ar Geman,
2674] ‘chuingim-si fort ar an molad-sa, acht oen ni, ferann bec fil ocam, is h-e
2675] étairthech, co n-dernta-sa ernuighthe cu rub toirthech’. ‘IN t-immann do-righnis’,
2676] ol Finnén, ‘geibh ind uisqui, & sreith in t-uisci-sin tarsin bh-ferann,
2677] & bidh toirthech’. Do-righnedh samhlaid, & ba toirtech in ferann.


2678] CRAND leimh bai ic Rúadhan Lothra, crann o sileadh linn shomblasta
2679] for a faghbhudh cach in blas ba maith lais, conad de no lesaighdis na manaig
2680] na h-áighidh, conadh do sin{folio 67ra} batur manuigh Eirenn ac togra
2681] gu Rúadhan. Tangadar a dhaltae co Finnén cu m-batar ica acaine fris a
2682] dhaltada icá fhacbhail. Ron- gáidetar im dula leo co Rúadhan cu m-beth
2683] Rúadan i coitchinne m-bethadh amail cach. Luid Finnen immaille friu gu
2684] Lothra. Ba h-edh toissech do- chuatar cusan crann cu tard Finnén crois dia
2685] bachaill tarsin crann, conná ro sil banna ass. O ro- chuala Rúadhan inní-sin
2686] do-raidh uisqui a thopair do thabairt dó. Do-rigne ernuighthe. Do-soud uisqui
2687] na tiprat a m-blas lenna. In lind rucadh do Finnén cona noemhuibh do-rat-sidhe
2688] airrdhe na croiche thairis. Ro sóud fo cedoir a n-aicned uisqui. ‘Cia
2689] tarba sin’? ar na cleirig fria Finnén, ‘mina choiscir in tiprait’? ‘A braithre
2690] inmuine’! ar Finnén, ‘cidh táithe do Rúadhan, ár cidh a bh-fhuil d' uisce isin
2691] monaidh-sea i taeibh in reclesa bhus ail leis do shoudh i lind shomblasta,
2692] do-gena Dia aire’. Ro gádatar iarum diblinaibh Finnén & na noeib inhí
2693] Ruadhan co m-beth a betha amal chach. At-bert Rúadan do-ghenadh sein
2694] ara aidi, ar Fhinnen. Ro cesnuigh cena ferann beag bui imon recless
2695] do bheith etoirthech. Ro bendachai dano an ferann sin, conadh toirthech.


2696] Luid Finnén iar sin i crich Connacht co Druim Eitir Da Loch i nh-Úaibh
2697] Oililla. Fuair Muisi & Ainmire ann ara chind & siat toirrsech do écaib a
2698] sethar an lá-sin. O ro airigh Finnén inni-sin luidh isin tech i m-bai corp na
2699] sethar. Do-righne depraccoit n-dicra n-dedhghair fri Dia, cu ro thodhuisc in
2700] caillig a báss, cu m-bui ica (fh)erdhaighis, et cu ro mharbh in laegh bui fo a
2701] h-aen bhoin, & cu tuc drolmaig n-englaisi dhó, cu ro bennach Finnén an englais
2702] curra soudh a m-blas fina. Frith didiu in laegh beo 'arnamharach fo a

p.81


2703] mhathair. Ro morad ainm De & Finnéin triasin moir-mhirbuil-sin. Ro edbair
2704] iar sin Múisi & Ainmire a reclés do Día & d' Finnen.


2705] LUID Finnén iar sin isin Corunn i crich Luighne. Tainic Crumtir
2706] Dathi co m-bai amalle friss. Tainic aingel Dé co n-ebairt fris: ‘In bhaile’,
2707] ar sé, ‘in debera fer dot muindtir frit ‘is caein in t-achad-so’:{folio 67rb}
2708] fothaig eclais ann’. Nir' bho cian co n-debairt fer dia mhuinntir-seom: ‘As
2709] cain’, ar se, ‘in t-achad-so’. Ro fhothaig-siumh iar sin eclais isin inadh-sin.
2710] For-fhacaibh cruimthir Dathi isin dú-sin. Ita innsin tipra Fhindein & a lecc.
2711] Geb e duine othair dhech isin tiprait ticfa slan eisdi. Geb e dámh dhuilech thí
2712] cusin n-airchindech ni berthar a einech acht gu ro ghabha a phater oc on leic-sin.
2713] Sic Tipra Fhinnein & Leac in Pupail ic Achad Abla.


2714] TAINIC iar sin Finnén i Coirpri Mhoir. Aengus ba rí an inbhaidh-sin i
2715] Coirpri. Tainic a mac-saidhe .i. Nechtain, do dlomad don cleirech. Ro leansat
2716] cosa a mhuinntiri don talum & at-bath fein. Táinic Aenghus iar sin
2717] cu tard a reir don clérech, co rus-dúisigh a mac do a bás, et co tard inad
2718] reclesa dhó. For-fhacaibh-siumh Grellan mac Nat Fraeich annsin.


2719] O ra fhothaig tra Finnén cealla & congbhala fon n-innus-sin, et o ra proitche
2720] breitir n-De do feruibh Eirenn, do-dechaid docum a reclesa gu
2721] Cluain Iraird. LAA n-oen ann-side do espoc Senaigh, dia dhalta-somh, ica
2722] fhégad, amlaid at-connaic a caeile & a troighi mhoir h-e, in meit co n-airmitís
2723] a esnae triana étach inmhedhonach amach. At-connaic dano in cruimh do
2724] thechta as a thaebh, et ba h-e in fath, ón uar-chris iarainn búi uime ardaigh
2725] pennaiti don curp cu ro thesc gu cnaimh. Caíis iar sin espoc Senaigh.
2726] ‘Cidh dot-gni toirsech’? ar Finnen. ‘Do chaeili-siu’, ar espoc Senaigh.
2727] ‘Ferfaidh cruimh for h' asnaibh-si in chaile-sin’, ar Finnén. Moidi ón rochái
2728] espoc Senaig. ‘Cuma dano duit’, ar Finnén, ‘toirrsi dho sin. Beruidh
2729] aen duine do corp docum n-adhnacail’.


2730] IS lia, tra, tuiremh & aisneis a n-derna in Coimdhe do fertuibh & mhírbhailib
2731] ar noemh Fhinden: áir mina thisadh a spirut fein no aingel de nim
2732] dia n-indisi, ní caemhnacair nech aile a mhiadhamhla, a bhetha inmhedonach,
2733] a comhairbirt bith-bhuan in cech lithlaithe, acht is Dia nama rodus-fidir.
2734] Ba sí immorro a proinn lai .i. boim do ar an eorna & deogh do uisce: i
2735] n-domhnaighibh immorro & i sollumnaibh boim do ar an cruithnechta, & orda
2736] do bradan fhonaithi,{folio 67va} & lán copain do mhidh ghlan no do chormaim.
2737] No chairighedh na daine at-ceth ac craesachad & no ciedh & na

p.82


2738] pendedh a pecad. Ni chodlad for clúimh na for colcaidh, co comhairsedh
2739] a thoebh re h-uir noicht, & cloch do fhrithadhart fo chind.


2740] Glan-edhbartach do Dhia amal Aibel mac Adhaimh. Diprocoitech amal
2741] Enoc mac Iareth. Luamhaire lan-toltnaightech do airec no do fhollamnacht
2742] na h-ecalsa eitir tonnaibh in t-saeguil amal Noe mac Laimhiach.
2743] Fir-ailitir amal Abraham. Búidh bláith amal Moysi mac Amra. Feidil
2744] fodhailtech amal Iop. Eacnaid eoluch amal Sholam mac n- Daibhíth. Primh-proiceptoir
2745] coitcenn & leastar togaide amal Pol apstal. Et cosmailighter o
2746] mhodhaibh imdhaibh fria Pol, áir amal ro genair Pól tes a tir Cannan, a cenel
2747] & a bhunadas tuaidh a tir Caldea, as amhlaid sin ro genair Finnen i bhus, i
2748] Laighnib, a cenel & a bhunadns tuaidh a n-Ulltaib. Et amal ro legh Pól ic
2749] Gamaliel, ic sui in reachta, fri re .xxx. bliadne cur' bhó sui, as amlaid ro legh
2750] Finnén ag na suidhib Bretnachaibh adubramar fria re .xxx. bliadne cor' bó
2751] sui. Et amal ra tairmesc an t-aingel Pól na dighsed do Damaisc, acht cu
2752] tised do shiladh irsi & creitmhe do chách, is amlaid sin ro tairmisc in t-aingel
2753] Finden na dighsed do Róimh, acht co tised do shilad irsi & cretme do feruibh
2754] Eirenn. Et amal ro nertadh o Dhia Pól, iar fothugud ceall & eclas &
2755] cathrach isin athardha in ro ghenair, co tisedh do forceatal irsi & creidmhe
2756] do Roimh, as amlaid ro gressedh o Dhia noeibh Fhinnen, ar fothugud ceall
2757] & cathrach 'na athardha, co tised do mhúnud & d' foircetal noemh Eirenn gu
2758] Cluain Iraird. Et amal ro tharrngair aingel do Pól na bhadh ithfirnach
2759] cu bráth nach aen no ragad a n-uir Romha, as amhlaid ro tharngair in t-aingel
2760] do Finnén na bhadh ithfirnach iar m- brath cach aen tara ragad uir Arda
2761] Relec. Et amal at-bath Pól i Roimh dar cenn in popuil Cristaidi, arna
2762] h-erbailtis uili a pianaibh & i todhernaibh ithfrinn, as amlaid at-bath Finnén
2763] i Cluain Iraird dar cenn popuil na n- Gaeidhel, arna h-eplitis uili don Buidhi
2764] Chonnaill.

{folio 67vb}


2765] Et is annsin ro tharrngair in t-aingel do-somh co n-indarbfad
2766] gach teidm & gach galar coitcenn a Cluain Iraird tre irnaighthi in t-samhail
2767] & co n-indarbfadh a h-Eirinn uili tre troscudh shámhaid Finnéin isin
2768] pupull ic Ard Relic & ic Achad Abhull & i Condail.


2769] O do-dechaid immorro cusna deidhinchaibh dontí noeimh Fhinnen,
2770] ro fhaidhestar a aingel comuidechta co h-Inis Mac n-Indeirc fri Luimnech,
2771] co tuc-side Colum mac Crimhthain cona theigh liubhar fo dhuibh nellaib

p.83


2772] cu Cluain Iraird, cun ro ghaibh Finnen coman & sacarbhaicc dia láimh, cu
2773] ro fhaidh a spirut dochum nimhe i cinn .xl. ar cet bliadne.


2774] Ata immorro intí noeimh Fhinnén i n-aibnes & i n-airfitedh etir muntir
2775] nimhe i bh-fhiadhnaisi Dhe dia ro fhoghain. ITat a relce & a thaisi gu
2776] n-anoir & gu n-airmhidin i talmain, co fertuibh & co mirbhuilib gach laithe, co
2777] traeth gach aen tic friu & coimhedaid gach aen cungnus leo.


2778] Gidh mor immorro intí noeim Fhinnen i n-etarscarad a chuirp & a anma
2779] on mhudh-sin colleic, bidh mo a anoir iar n-eiseirghi ind oentuidh noemh
2780] nem-truaillnidi, i mor-dhail bratha, in tan bus bretheamh for fheraibh Eirenn &
2781] for a mnaibh imalle fria Patraic (&) Issu Crist. Taitnighfidh insin amal grein.
2782] Biaid isin mhor-mhaith-sin, ind aentuidh noemh & noem-ogh in domuin, i n-aentaidh
2783] naei n-gradh nimhe na dernsat imarbhus, isan aentaid is uaisli cech
2784] n-aentaid, i n-aentaid na naeimh-trinoidi, Athair & Mac & Spirut Noem.


2785] Ailim trocaire Dhé, ro airiltnigem in aentaid sin! In saecula saeculorum.
2786] Amen.

p.84