Corpus of Electronic Texts Edition
The Metrical Dindshenchas (Author: Unknown)

poem/story 125

CELL CHORBBÁIN

  1. Cell Chorbbain, clár cen chreidim,
    cus' tathig dám is dirim,
    la Pátric Macha a mór-raind,
    toraind nar tacha tirim.
  2. Failet náem, dam cen dimblad,
    nonbur 'sa m-bág ri Bregmag:
    céin beit a m-buada ar bruidnib
    turmid sluag trúana ar tend-blaid.
  3. Molling dia lluid a Breg-dáil
    dessid 'sin chill chaid chomláin
    Sraphan, Lucan is Lugná . d,
    Muadán, Cerbban is Chonlaid.
  4. Corbbán, rochind for crábud,
    fail sain chill fo chraibaib:
    Baetán, nar brónach álaig,
    in nomad naem da naemaib.
  5. Failet nói ríg, reím n-ága,
    i Cill Náis fo neim niamda,
    Murícan moen cen merball,
    Cerball is Cellach cialla,

  6. p.342

  7. Colmán, Broen, is Bran beoda,
    Find, Faelán, Dunchad dana,
    i Cill Chorbbain, rochuala,
    roclaitti a n-uaga ága.
  8. Failet nói mná co massi
    thall a taissi i tóeb chroisse,
    Sadb is Etáin cen uissi,
    Medb is Deccair Deir Choisse.
  9. Aillend is Aíne i n-oen-úaig,
    Ailbi ocus Aife fhir-fhíal,
    Uasal oen-gel, ben Fhaelain,
    mór saer-fher diarbu fhir-mian.
  10. Nonbur ríg, nonbur rígan
    tucsat sir-blad da sámud,
    is nonbur náem bud naemdu,
    bad oebdu cin ó Adum.
  11. Imdai ríg ocus rignai
    is gillai gribdai grada
    aes uird is cheóil fri córgud
    la toeb tri nonbur n-dana.
  12. Inmain cathir is chlith-rúaim
    cos' tictis maith-fhir mochrad:
    alaind in senud seng-thaeb,
    cuiri cend-caem dar clochan.
  13. Cech erraig, uair cen fhaille.
    tictis sluaig luaith, dar linne,
    co Cerball daith cen dognus:
    ba maith a corgus cille. C.
  14. Gormlaith glórda cen gainni,
    rígan ríg Fómna finni,
    doringni gnímu grána,
    ingen ríg Traga Tinni:
    Aillend is Chellach Carmain
    dosfuc i talmain cilli. C.

  15. p.344

  16. Ni raibi duini daidbir,
    crech no chuire no chend-gail,
    ni rabi dám cen deg-raind
    i flathius Cherbaill chend-glain.
  17. Cerball, nir dúi ciar dót-mer,
    diar' chlúi ar Cormac in chetail
    tri fichit cet is coicfhiur
    tuitset ria n-óc-fhiur Etair.
  18. Coic ríg trichat cen chreidim
    rogabsat h-Erinn n-alaind
    o Lagnib na cath cétach
    otá Etar co h-Araind.
  19. Cóic rig déc, cen daidbri dám,
    gabsat rám os Raigni rúad
    o Fhaelan, cen daidbri dál,
    cosin n-ár i n-Albe úar.
  20. Nir shamla Cherball ri nech
    hi cein bess Bregrand ar bith:
    nir chumma nech ris im chath
    nir chumma a chrech nach a chath.
  21. Ni raibi ríam a chomfhíal,
    ni tharat biad do bran-eon,
    reme nir chin a chom-chaem:
    scele a moch-thaeb fho fain-eor.
  22. Iar n-ól a fhled ba forlond,
    tri fichit med ba med-rand;
    tri fichit rig, reím n-deccair
    leis dia lepaid la Cerball.
  23. Ba h-ollom berla Féne,
    ba leignid leire mebra,
    ba faid, ba fili forba,
    ba suí solma na senma.

  24. p.346

  25. Ba gaisgedach cen gainne,
    rí taistelach cen timme,
    marcach os echaib ána,
    nia craiti cana cille. C.
  26. Iar n-dola i n-debaid n-deg-theind
    notheilged foga frithgrind,
    ba gnáth a h-aithle affrind
    co tabrad fath ar fithchill.
  27. A secht fo thrí cen daidbre
    rothecht ar Laigne linne
    flathius Cerbaill cuir Carmain,
    col-luid i talmain cille. C.
  28. Triar ic dul dar Banba m-bind,
    cath Liamna, labrad lan-grind,
    Caemgen in dag-fher nosding,
    Brigit Lagen dia lar-chill. C.