Corpus of Electronic Texts Edition
The Metrical Dindshenchas (Author: Unknown)

poem/story 92

INIS SAMER

¶1] Inis Samér, cidh díatá? Ní ansa. Díambaí Partholón isinn indsi sin & a ben .i. Delgnatt, & a ghilla .i. Toba, & a chú .i. Samér, doluidh Parrtholón a aenur immach do chúartughudh an feraind. Aentaighid imorro día éis a ben & a gilla, & ebhait digh ceachtar


p.290

n-aí a cúach robaí ac Parrtholón. Doroich Párrtholón íarsin día thigh, & conaitecht digh, & doberar dó a chúach, & ibis digh tríasin cuslind órdha baí as, & airighis fair an días do ól as, & foreitir andsidhe co n-derndsad míchostudh. Tic an chú chuice íarsin, & dobeir-sium bem dia bhois do, conadhromarb. Conidh é sin céd-éd Erenn. Conadh ón choin-sin raiter Inis Samér frissin n-insi & Samhér frisin n-abaind, conidh e sin ced-éd Erenn & cedna drúis Erenn. Luidh an gilla ass íarsin for baí chaí, & noseathat coin & eathaide h-é. Sé bliadna .x. imorro do Párrtholón íarsin conisfuair bass.