Corpus of Electronic Texts Edition
The Metrical Dindshenchas (Author: Unknown)

poem/story 75

CNUCHA II

  1. Cnucha, canus rahainmniged? Ní ansa. Cnucha, ingen Chonnaid a h-iath Luimnigh, buime Chuind chét-chathaig, dochoidh and do tham ina tigh feisin, ocus dohadhnaiceadh la Connad isin chnuc ugad .i. Cnucha. Unde Cnucha dicitur.

  2. p.266

  3. Cnucha, cnoc ós lind Life
    roboí úair ba h-airithe:
    ba dún oíged, roboí tan,
    dia rabi ac Túathal techtmar.
  4. Fert in Drúad a ainm reme
    ri cét-remes Ugaine
    co remis Cuinn i Cnuc Brain,
    co tánic ingen Chonnaid.
  5. Muime Chuinn, nocharad raind,
    ba h-í Cnucha chenn-álaind:
    roboí 'sin dún fo dathaib
    ri remis Cuinn chét-chathaig.
  6. Cnucha, ingen Chonnaid chais,
    a h-íath Luimnig lethan-glais,
    dochúaid écc do thám 'na tig:
    robo gád la Gáedelaib.
  7. Adnacht in ben, cíarbo brón,
    isin chnuc 'na chert-medón,
    conid Cnucha óshin immach
    a chomainm co bráth m-brethach.
  8. Is é sin, a lucht nad gann,
    a rús fír óshin anall,
    senchas na tulcha-sa ana
    ria n-apar co cert Cnucha. Cnucha.

  9. p.268

    Prose