Corpus of Electronic Texts Edition

The Metrical Dindshenchas (Author: Unknown)

poem/story 71

LOCH LAIGLINDE

1. Loch Laiglinde, loch na tonn,
   co fúair ainm tri écomlonn?
   cid h-é a ainm, nírb ed roime
   nocor' báided Laiglinde.
2. Táinic Laiglinde, an láech lir,
   a cáeca láech co longaib,
   co torchair in cáem 'sin glind
   re táeb tobair don dílind.
3. Romaid iman mag amach
   tond asin tipra thiprach,
   co n-derna loch can tráig de
   ocus cor' báid Laiglinde.
4. Tipra Dera meic Scera
   rob é sin a h-ainm chena:
   Tipra Dera, ba h-ainm dí
   nocur' báided Laiglindi.
5. Delgnat ingen Lochtaig luind,
   ben Parrthalóin don phrím-thuind,
   máthair Laiglinde co m-blaid,
   ara tuc tonn trom-dígail.
6. Cáeca ban, ba mór an gním,
   im Delgnait, 'ma mnaí in aird-ríg;
   dochóid 'sin duma ara n-éis:
   romarb guba re n-aisnéis.
7. Is misi Findtan abus:
   ragab isa maithreachus:
   atá lem can cadhus de
   senchus Locha Laiglinde. Loch.

---

p.258