Corpus of Electronic Texts Edition

The Metrical Dindshenchas (Author: Unknown)

poem/story 65

DRUIM SÚAMAIG I

1. Druim Súamaig, dara saigid,
   co slúagaib, co sídchairib,
   fon druim dúanach co n-duba
   fail Súamach mac Samguba.
2. Ba fáith, ba fili, fír dam,
   ba suí, ba sencha solam,
   Súamach, cen chaite caccaid,
   aite ríam do ríg-maccaib.

---

p.236

3. Ingen Gaimgelta, in glúair glé,
   meic Rodba meic Thúaig Tuile,
   Caindlech, nírb étig ria h-ail,
   ba sí sin sétig Súamaich.
4. Altsat a n-dís immalle
   Cormac, cond na loingse-se,
   mac ríg Ulad co n-úath-bla,
   hi crích curad cáem-Chrúachna.
5. Diar' chechaing Cormac aníar,
   in borr-shlat cosin bláth-níam,
   ó Chrúachain, nach rabáid blad,
   do gabáil ríge n-Ulad;
6. Ó rosíacht bruidin na m-breth
   Cormac, duilig a debech,
   Da Choca, cen tlás temil,
   fúair bas ocus beó-thenid.
7. Cechaing Súamach dar cach sruth
   dia aurgaire, dia astud,
   is a ainder ér arnaid
   co Tulaig nDér n-dron-adbail.
8. Déra in Dagdai, díles dó,
   ic caíniud Áeda ó Áth Nó:
   roscí rí Cuilt, in curaid,
   ina thuirt 'sin trom-thulaig.
9. Ó doríacht cen laice ille
   aite in maic maith 's a muime,
   adcíat in daigid n-duilig
   'na brainig don beó-bruidin.
10. ‘Díaid oirgne Cormaic adciu’,
    ol Súamach, ‘ic serb-laigiu:’
    ‘dalta romdechair cose,’
    ‘ní béo im bethaid dia ésse.’

---

p.238

11. Ronguil Caindlech, cruth rochar
    is roscaíl a folt find-glan:
    fúair a tairnem, a tuirim
    i n-Ard Chaindlech comduilig.
12. Comainm na cnoc, ní celar,
    ó díth na deise atberar:
    réil cen min-dergnas don maig
    dindshenchas Dromma Súamaig. D.