Corpus of Electronic Texts Edition
The Metrical Dindshenchas (Author: Unknown)
poem/story 43
LUSMAG
- In eól duíb aní dia fail
Lusmag cosin lí luchair?
ria cath Maige Tuired te
ba Mag Muired Moncaide.
- Ó chath Maige Tuired túaid
ainm dó Lusmag co láech-búaid:
and roben Diancécht cen chair
lus ra cach crécht dia chobair.
p.184
- Conmelt cach lus, láthar nglé,
hi fus ar tiprait Sláinge:
i n-Achud Abla fuilech
ba cabra ríg robuidech.
- Cach láech nolaiged fon lind
atraiged súas co slán-grind,
cen on cen anim cen olc
for agid nó for ard-chorp.
- Is ed sin fodera tan
Lusmag na lega labar:
do gnímrad Diancécht na ceól
drécht co n-dírgud rodag-eól. In.