Corpus of Electronic Texts Edition
The Metrical Dindshenchas (Author: Unknown)

poem/story 35

SLIAB FÚAIT II

  1. Finnaid úaim, co ségda suairc,
    aní dia n-abar Slíab Fúait,
    ar domrala sund co cas,
    co fesabair a shenchas.
  2. [Fúat mac Bili, beóda in fer,
    tuc leis a h-indsib Maigden
    tar cach rót 'na rémimm ráin
    fót co h-Érinn a h-Espáin.]
  3. Fúat úa Breogain, bailc a bann,
    ba trén dar tíre trebann,
    óclach nárb úathad 'na luing,
    taísech búadach mac mBreoguinn.
  4. Fúat úa Breogain, bailc a bann,
    ba trén dar tíre trebann,
    ruc céim cen gúasacht grinne
    co h-inis na Fírinne.

    5. p.168

  5. Tuc leis do lár na h-indsi
    fót dar tonna trón-millsi,
    co rofuirim, cadla in chúairt,
    sunna for lár sléibe Fúaitt.
  6. [In fer atbeired gaí nglais
    ós chaín in fhóit eochar-glais,
    don fhót ba soblad in sód,
    ní fodmad cen a impód.]
  7. In tan ba fírén in rí,
    nobíd in fót fo cháem-lí :
    mad dia ráided goí in cach than,
    súas nochuired a fhaescal.
  8. [Maraid in fót 'sin tshléib thúaid,
    co fúair 'sin rót cach robúaid :
    fót ná fuilnged claíne cúac
    tuc fer cen saíbe sáer-Fúat.]
  9. Is fair-sin, céim cen timme,
    do chomét na fírinne,
    doluid iar céin móir cen gait
    in t-apstal prímda Pátraic.
  10. Atá sunna fót co lí
    fótán tíre tairngiri,
    i maig Náir, níthach a nert,
    dogén co follus foderc.
  11. Doáirim úa Duinn duibe
    fót Cinn builid Berraide
    do sheól co becht dar' fuaig lib
    cert sléibe Fúait, is finnaid. F.

    12. p.170