Corpus of Electronic Texts Edition
The Metrical Dindshenchas (Author: Unknown)
poem/story 2
ESS RUAID II
- Oclach thainic co h-Ęd ruad,
mad ail do neoch a imluad,
comlond cet san oclach cain,
tuaristal ced roriaraid.
- Cuid enfhir do biud re lind,
comlond ced re fuair n-imrind:
oclach thanic co h-Ęd la,
rob iad sin a chomada.
- Ni suaithnig a senchus sunn,
oclach meic buidnig Burnd:
ce dorindi gnim can cleith,
ni sochaidi rusfider.
- An afus is rodfia sin,
a oclaich find re bliadain:
naisc oraind cach ni conaig,
ocus comaill a ngellaig.
- Cuindgis in t-oclach can on
a cind bliadna a thuaristol:
Ni thibar ar Aed co brach
acht urdail re cach n-oclach.
- Mar dabadar ime sin
aenan la iarsin m-bliadain,
teit ri na leas is na tor
isan eas da fhothrucod.
- Eirgis in t-oclach co garg
re crandaib a shleag roard:
greisis a churu na chend
a fiadnaisi fer n-Erind.
p.8
- Ce cuirthear in muir am ceann,
ar aird-ri aebda Ereann,
nocho bera uaim co brach
acht urdail re cach n-oclach.
- Cuiris in muir ina cheann
a fiadnaisi fer n-Ereann,
cor'baidead Aed ruad 'con gaith,
a tuaristal in oclaich.
- Eas Ruaid uirri osin ille
aran eas, is biaid chaidche:
Eas nDuind e a h-ainm reme,
mac Dubain is mac Bile.
- Is h-e cét-oclach can on
rogob cor na thuaristol,
Fiacha mac Nemid sech cach:
is do Laignib in t-oclach. O.