Tlachtga canas roainmniged? Ni ansa. Tlachtga ingen Moga Ruith meic Fergusa. fordaroebleingatar tri meic Simoin druad. doluid lie athair do foglaim druideachta in betha. Ar bith is i do righni do Thriun in Roth Ramach & in lia i Forcarthu & in Coirthi hi Cnamcaill. Tarlai iarum anair & in déde sin lei co toracht Tulach Tlachtgai. conid and roslamnad. & ruc tri maca .i. Doirb a quo Mag nDoirb & Cumma a quo Mag Cuma & Muacha a quo Mag Muaich & co ndechsat na tri hanmann sin indermat a hEre nistoraig digal echtrann. Unde Tlachtga dicitur.2
- Tlachtga tulach ordan uais
Forbad mór rígh corocruais
ón cém rosgabh Tlachtga toich
ingen modha réil righ Roigh
Mog Roith mac Fergusa Fáil
meic Rosa ríghdha ronáir.
Cacht ingen Caitmind na cleas
a máthair daith-grind dhiles.
Roth mac Riguill rohalt hé
de ba Mog Roth rogaide.
Da meic Mogha: Buan is Corb
sona dar sluagh ac saerord.
ba hí máthair na mac mas
Der-Droighen dúr dron —amhnas
& máthair cert Cairpri
is becht romoblain Húi-Bairdne.3
Inghen Moga mílib sluag
Tlachtga toga na r'thaebfuar—
Luid le hathair ndímor ndil
co Simon saer seacht-maisidh.
Tri meic la Simon ba sám
ba dímór an diabulbhágh
nero cairpeint4 i su-etir5
ba balcgeint6 co mbeogletin7
Doradsat na meic mo alle
serc do Tlachtga trathaite
cor silsat a broind8 gan bréig
du chloind9 a comadais coiméid
Tlachtga do Triun10 nirbo thim
dorigni in Roth ruad roigrind
moraen la Mog ndímór ndil
is ra Simon seachtmaisigh
hí durod lé in fuighell fis
forfágaib in roth roclis
Lia foirbthi Forcarthain faind
& in Coirthi hi Cnámhcaill.
Dall gach n-aen nodn-aiccfe sell,
bodhur gach aen nod-chlunend
marb risambenfai ni de
dun roth gharbh grennach grinne.
Iar tuideacht anair don mnai
ruc tri macca co morghnai,
adbath diambreith in mer mend,
scél mor gan chleith do chluinam.
Anmand na mac—luadh nad creas—
Muach is Cuma is Doirb diles.
In tsloig o toraid roseacht
dóib is comaid a cloisteacht
hi céin bed os Banba11 bil
anmand na mac i martain
i scel fir fri silad sin
na tic dibad dia daínib.
In cnoc in rohoilad uag
do mnai na n-airer nad uar
tar gach soghairm sui sana
is dó is togairm Tul Tlachtga.Tlachtga.