Corpus of Electronic Texts Edition
Fíthels Ratschläge an seinen Sohn (Author: [unknown])

p.112

‘Cid imma n-gabthar trebad?’ ol a mac fri Fíthel. ‘Ní h-ansa. Im indeión cothaigthe,’ ol Fíthel. ‘Ceist. Caide an inneóin threbtha?’ ol in mac. ‘Ní h-ansa. Ben maith,’ ol Fíthel. ‘Cinnas do aithgénmais in degmnái?’ ol in mac. ‘Asa deilb & asa costud, a tlás, a fos, a féile. Ní thuca in cóil n-gairit, osí chamm finnfadach. Ní thuca in remair n-gairit. Ní thuca in finn fotai. Ní thuca in dubsúilig n-dochoisc. Ní thuca in uidir n-apuide. Ní thuca in duib teimlidi. Ní thuca in cenainn n-gáirechtaig.

p.113

Ní thuca in cóil clannmair, osí drúith édrúith. Ní thuca in líthig míbésaig.’ ‘Ca ben dobér?’ ar in mac. ‘Da fagair na móra finna & na báingela duba, tabair íet.’ ‘Cid as dech do mnáib?’ ‘Ni h-ansa. Ben maith nád fitir fer romat ríam & ma fagair sin, as í in ben sáer so-chinéilech sochruid co n-degbésaib & co lámthorad’.

‘Cid do-gén muna fagar mar sin íat?’ ‘A n-gabáil tar a n-ainme cipé cruth i m-beid.’? ‘Cia ben is mesa do mnáib?’ ‘Ní h-ansa. Bé chárna.’ ‘Cid is mesam iná sin?’ ‘In fer do-beir í.’ ‘Cid is mesam iná sin?’ ‘In mac géntar úatha ar áen. Ar ní bí cen meing, cen mebail ann do gnáth.’

‘Cúic airdena déc degmná: cíall, cóime, connlacht, náire, áille, áilgine, saidbres, sóire, sogóidelg nó soitnge, tlas, fos, feile, gáis, idna, indracus.’

‘Cúic airdena déc drochmná .i. doinnme, díbe, dímaine, labra, leisce, liuntaige, glór, gráinne, cesacht, cúairt, goit, céilide, drúis, báes, brataige.’

Finis.