Corpus of Electronic Texts Edition
The Annals of Ulster (Author: [unknown])

Year U1177

U1177.0

Kal. Ian. uii. f., l. xx. uii., Anno Domini M.c.lxx.uii.

U1177.1

Dun Da Lethglas do mhilledh do h-Eoan do Chuirt & dona riteribh tangadur imaille ris & caistel do dhenamh doib ann, asa tucsat maidm fa dhó for Ulltaibh & maidm for Cenel n-Eogain & for Airghiallaibh, dú in ro marbadh Concobur h-Ua Cairellan .,toisech Clainni

p.186

Diarmata, & Gilla Mac Liac h-Ua Donngaile, toisech Fer Droma & in ro gonadh do saightibh Domnall h-Ua Laithbhertaigh—& marbh é do na gonaibh sin i reicles Phoil i n-Ard Macha, iar caithim Cuirp Crist & iar n-a ongadh—& in ro marbait maithi{folio & column MS2 54d} imdha aili. Do-rat dono Conchobur h-Ua Cairellan reime-sin .i., isin n-errach maidm for h-Ua Mael Doraidh & for Cenel Conaill, dú in ro marbadh ár Ceneoil h-Enna 'ma mac h-Ui Sherraigh & ima maithibh imdaibh archena.

U1177.2

Milidh Gocan cona ritiribh do breith do mac Ruaidhri .i., Murchadh h-Ui Concobhuir co Ros Comain do milliudh Connacht{folio & column MS1 53a} ar ulcaibh re athair. Ro loiscset imurra Connachta fa cetoir Tuaim Da Gualann & cealla archena in tire ar ulcaibh risna Gallaibh & tucsat maidm forsna Gallu & ro dicuirset ar eicin as a tir iat. Ro dhall dono Ruaidhri h-Ua Concobuir in mac-sin .i., Murchadh iar sin, i n-dighail in turuis-sain.

U1177.3

Aedh h-Ua Neill .i., In Macamh Toinlesc, ri Ceneoil Eogain re h-edh & ridomna Erenn uile, do marbadh la Mael Sechlainn, mac Mic Lochlainn & la h-Ardgal, mac Mic Lochlainn .i., mac don Mael Sechlainn sin. Ardgal dono fein do marbadh do h-Ua Neill ic a marbadh annsein.

U1177.4

In Timpanach h-Ua Coinnecen, ard-ollam Tuaisceirt Erenn

p.188

do marbadh do Chenel Conaill cona mnai & cona muinnter.

U1177.5

Sluaghadh la h-Eoan do Cuirt & lasna ritiribh i n-Dal Araidhe, & gu Dun Da Lethghlas, dar marbsat Domnall, mac mic Cathusaigh, rí Dal Araidhe. Tainic dono h-Eoan don turus cetna i nh-Uib Tuirtri & i Feraibh Li, co ro loisc Cú Midhe h-Ua Flaind Airthear Maighi reimhe & co ro loiscset Cuil Rathain & chealla imdha eile.

U1177.6

Niall h-Ua Gailmredhaigh, rí Fer Maighi Itha & Cheneoil Enna, do marbadh do Donnchadh h-Ua Chairellan & do Clainn Diarmata, ar lar Daire Coluim Cille & tech do loscadh air ann, co tainig as amach, co ro marbadh i n-dorus in taigi. Do-roine dono Donnchadh h-Ua Cairellan,toisech Clainni Diarmata, sith re Colum Cille & re Muinnter Daire annsein tar a cenn fein & a mic & a oa: .i., a mainchene féin tria bithu & a meic & a oa & a iarmoa co brath do Colum Cille & do Mhuinnter Daire & baile biataigh i farradh Domnaigh Moir. Ocus Mac Riabhach, .i., corn is ferr do boi i n-Erinn, do tabairt do Mhuinnter Daire i n-gill re tri fichtibh bó. Ocus tech dho denum don cleiriuch, isa tech ro{folio & column MS2 55a} loiscedh for Ua n-Gairmledhaigh & a crodh uile do ic fris do neoch ro loiscset imi. Clann Diarmata imurra archena do dhenum shitha tar a cenn fein.

U1177.7

{§LATE} Uiuianus Cardinalis uenit in Hiberniam. Senudh chlereach Erind i nd-Ath Chliath cum Uiuiano.

U1177.8

Conchubhar

p.190

Maenmhaidhe do ghabhail la athair, .i., la Ruaighri h-Ua Conchobhair.§