Corpus of Electronic Texts Edition
The Annals of Ulster (Author: [unknown])

Year U1166

U1166.0

Kal. Ian. uii. f., l. xx. ui., Anno Domini M.c.lx.ui.

U1166.1

Domnall Mac Gille Mo Cholmoc do marbadh do Laighnibh{folio & column MS1 50d} fein.

U1166.2

Cu Cuach Mac Gilli Espuic do marbadh do Dunn Sleibhe, mac mic Eochadha.

U1166.3

Aedh h-Ua Mael Fabhaill, ri Cairrce Bracaidhe, do marbadh la Muircertach h-Ua Lochlainn per dolum.

U1166.4

Ard Macha do loscadh


p.152

la fheile Senach & Cetain ar ai laithi sechtmaine & ochtmadh uathadh ar aí aessa esci: .i., o Crois Choluim Cille, na di sreith co Crois Espuic Eogain & o Crois Espuic Eogain in dara sreith co Crois doruis Ratha & in Raith uile co n-a templaibh,—cenmotha Recles Poil & Petair & uaiti do taighibh archena—& sreith fri Raith aníar,—.i., o ta Crois Sechnaill co Crosa Brighti, achtmadh becc.

U1166.5

Cenannus & Lughmagh & Inis Cain Dega & cella imda aile crematae sunt.

U1166.6

Et Daire Coluim Cille ex maiore parte cremata est & in Dub-reicles do loscadh: quod non auditum est ab antiquis temporibus.

U1166.7

Ocus Ardd m-Bó do loscadh o Ruaidhri, mac Mic Canai & o mac Gille Muire h-Ui Monrai & o Crotraighibh.

U1166.8

Eochaidh Mac Duinn Sleibhe do dhalladh la Muircertach h-Ua Lochlainn, tar slanachus comarba Patraic & bachla Issu & Donnchadha h-Ui Cerbhaill, .i., ardri Airgiall.

U1166.9

Sluaghadh la Ruaidhri h-Ua Concobair i Midhe, co ro gaibh braighti Fer Mídhe. As-sidhe co h-Ath Cliath, co ro gaibh braighti Gall & Mic Murchadha & Laighen uile. As-sidhe co Drochat Atha dochum Airgiall, co tainig Donnchadh h-Ua Cerbaill, ri Airgiall, i n-a thech & co tar{folio & column MS2 52d}at braighti dó & co n-dechaidh slan iar sin dia thigh, iar n-innarba Diarmata Mic Murchadha, righ Laighen, dar muir.

U1166.10

Sluaghadh la Donnchadh h-Ua


p.154

Cerbaill co n-Airgiallaibh & co n-Uib Briuin & Conmaicnibh h-i Tir n-Eogain d'innsaighidh h-Ui Lochlainn tria erail Ceniuil Eogain fein, ar trecadh doibh h-Ui Lochlainn, airdrigh Erenn. Co táinic-sim co dreim uathadh do Ceneol Eogain Tailcha Og do thabairt ammuis forru i Fidh O n-Echtach. Ocus cid iat-sidhe, do treicsit eisim. Co torchair ann Muircertach (mac Neill) h-Ua Lachlainn, airdrigh Erenn, & rob' é August Iarthair Tuaisceirt Eorpa uile, ar egnamh & gaiscedh. Ocus ro marbadh uathadh do Cenel Eogain ann, .i., tri fir déc. Mirbail mor & firt amhra do-righnedh annsin: .i., rí Erenn do thuitim cen cath, cen cliathadh, iar sarughudh dó comarba Patraic & Bachlu Isu & comarba Coluim Cille & Soscelai Martain & cléirech ímda aile. Rucadh tra a chorp co h-Ard Macha & ro h-adhnacht and, tar sarughudh{folio & column MS1 51} comarba Coluim Cille cona shamudh & ro traisc budéin Colum Cille ime & toisech mac leighind Daire im a breith d'a reilic.

U1166.11

Diarmait Mac Murchadha, toisech Muinnteri Birn, a suis fratribus interfectus est.

U1166.12

Sluagadh la Ruaidhri h-Ua Conchobair & la Tighernan h-Ua Ruairc co h-Es Ruaidh, co tangatur Cenel Conaill i n-a thech, co tardsat a m-braighti do h-Ua Concobair, co tarat ocht fichtiu bó doibh,i n-ecmais oir & etaigh.


p.156

U1166.13

{§LATE} Sluaighedh la Ruaidhri h-Ua Conchobair & la Diarmait h-Ua Mailechlainn & la Tigernan h-Ua Ruairc i l-Laighnibh, i n-Osraighibh, hi Mumain, co tangadur rigraidh Lethi Moga uile hi tech Ruaidhri h-Ui Conchobair, co ro rigsat h-e.

U1166.14

Gilla Mac Aiblen, comarba Brenaind Cluana Fearta, quieuit.

U1166.15

Toirrdelbach h-Ua Briain regnauit iterum, Anno Domini 1166.

U1166.16

No, comad ar in Kalainn-si tis tic marbadh Muircertaigh. §