Kl. Ianair i f. l. xx.ui. Anno Domini m.c.xx.uiii.{folio & column MS2 50rb} Bisextilis et embolesmaticus annus.
Fir Mhaigi Itha .i. Domnall H. Gailmredaigh & Cenel Maein do ghabail taighi for righ Fer Manach .i. for Faelan H. n-Duibh Dhara & a thuitim leó & sochaidhe do mhaithibh Fer Manach ime.
Gilla Patraic m. Tuathail comarba Coemhgin do marbadh d'Uib Muiredaigh for lar Glinne Da Locha.
Maidm ria marc-sluagh Concobhair m. m. Lochlainn for marc-sluaigh Tigernain Ua Ruairc i torchair H. Ciardhai ri Cairpri & Cathal H. Rogheallaigh & Sitriuc H. Mael Brigte & m. Aedha H. Dhubhdai ri H. n-Amalghadha & alii multi.
Muirghius H. Nioc airchinnech Tuama Da Ghualann fri re do éc i n-Inis in Ghaill.
Gnim granna anaithnigh ainiarmartach ro thoill escoine fer n-Erenn eter loech & cleirech do nach frit macsamhla i n-Erinn riam do dhenamh do Thigernan H. Ruairc & do h-Uib Briuin .i. comarba Patraic do nocht-sharughadh ina fhiadhnuise .i. a chuidechta do shlat & dream dibh do marbadh & mac-cleirech dia mhuinntir fein do bi fo chuilebadh do marbadh ann. Is e imorro an iarmuirt do fhass don mhi-gnim-sa conach fuil i n-Erinn comuirce is tairisi do dhuine fodhesta no curo dhighailter o Dhia & o dhoeinibh in t-olc-sa. In dinsemh-sa tra tucadh for comarba Patraic iss amal & dinsim in Comdhegh uair adrubairt in Coimdheo fein isin t-shoiscéla;
Luc. 10:4
Qui uos spernit me spernit, qui mé spernit spernit eum qui mé misit.’’Creach-sluagadh la Tairrdelbach H. Concobuir i l-Laighnibh co roacht Loch Carman aisseig timcell Laigen co h-Ath Cliath & do-roine bo-dhibadh mór in chonair-sin. O Ath Cliath da thigh doriisi. Atá tra michlu an t-shluaghaidh-sin for Thigernan H. Ruairc.
Creach la Maghnus & la Firu Fernmuighi h-i Tir Briuin co tucsad gabala mora. Beirid Tigernan co n-Uib Briuin & co sochaidi moir aile forro ic Ath Fhir Deadh. Ferthair tra cath etarru & meabaidh for Tigernan & for Uib Briuin & marbhtur .ccc. uel .cccc. dib i tosuch einigh Patraic.
{folio & column MS2 50va}Sluagadh la Conchobur H. Lochlainn & la Cenel n-Eogain & la Dal n-Araide & la h-Eirgiallaibh i Mag Cobha co tucsat giallu H. n-Echach. Impoit iar sin for a laim cli i feraibh Bregh co fargaibset dreim dia muinnter ann & co n-dernsat col mór fiadh Dhia & fiadh dhainibh .i. loscadh Atha Truim cona thempluibh & sochaide do dhul martra inntibh. Non impetrata pace Dei uel hominum retro ambulauerunt.
Sith m-bliadhna co leth uel paulo plus do dhenum do comorba Patraic eter Connachtu & feru Muman.