Anno Domini mcccxi.
In Thomond, apud Bonnorathe, mirabilis et miraculosa disconfectio facta per Dominum Ricardum de Clare super partes Comitis Ultonie, qui predictus Dominus Ricardus cepit in bello Dominum Willelmum de Burgo et Johannem, filium Domini Walter de Lacy, et multos alios: quoquidem bello multi corruerunt, tam de Anglicis quam de Hibernicis, decimo tertio kal. Junii.
Item, Tassagard et Rathcoule invaserunt latrones, scilicet, Obrynnes et Otothiles, in crastino Nativitatis Sancte Johannis Baptiste. Unde cito in autumno collectus est magnus exercitus in Lagenia ad impugnandum dictos latrones, in Glyndelory et aliis locis nemorosis latentes.
Item, Parliamentum tentum London, in Augusto, inter Regem et Barones ad tractandum de statu regni et familia Regis, per ordinationem sex Episcoporum, sex Comitum et sex Baronum qualiter utilius regno poterunt providere.
Item, secundo idus Novembris, Dominus Ricardus de Clara interfecit de Galogelaghes sex centum.
Item, die Omnium Sanctorum precedente, proscriptus fuit Petrus de Gaveston de regno Anglie per Comites et Barones, et multa bona statuta reipublice necessaria per eosdem sunt confecta. Qui Petrus abjuravit regnum Anglie circa festum Omnium Sanctorum, et ivit in Flandriam quatuor mensibus post et rediit et dictus Petrus cito post Epiphaniam furtive intravit Angliam, adherens lateri Regis, quod Barones non poterant faciliter ad eum appropinquare. Et adivit Eboracum cum Rege ibidem moram faciendo in quadragesima: unde Episcopi, Comites, et Barones Anglie London pervenerunt ad tractandum de statu regni, ne per dicti Petri redditum respublica commoveretur.
Item, obierunt Dominus Johannes de Cogan, Dominus Walterus Le Enfaunt, et Dominus Johannes, filius Rery, milites, et sepeliuntur in ecclesia Fratrum Predicatorum , Dublin.
Item, Johannes Macgoghedan interficitur per Omolmoy.
Item, obiit Willelmus de Rupe, Dublin, de ictu sagitte unius Hibernici montani.
Item, obiit Dominus Eustacius le Pover, miles.
Item, in vigilia Cathedre Sancti Petri, incepit riota Urgalie per Robertum de Verdon.
Item, interficitur Donatus Obrene per suos traditiose in Tothomonia.