Corpus of Electronic Texts Edition
Lebor na hUidre (Author: [unknown])


3220] Slicht Libair Budi Slani


3221] Seirgligi Con Culaind inso sís & óenét Emire


3222] OENACH dogníthe la Ultu cecha bliadna .i. tri lá ría samfuin
3223] & tri laa iarma & lathe na samna feisne. Iss ed eret no bitis
3224] Ulaid insin i mMaig Murthemni. oc ferthain óenaig na samna cecha
3225] bliadna. & ni rabe isin bith ní dognethe in n-eret sin léu acht cluchi &
3226] céti & ánius & aibinnius. & longad & tomailt conid de sin atát na trenae
3227] samna sechnón na hErend.


3228] Fechtas and tra fertha óenach la hUltu i mMaig Murthemni. & ba
3229] hairi no fertha leu fo bith tabarta do chách a chomraime & a gascid
3230] do gs cecha samna. Ba bés leu dano di ág inna comraime ferthain
3231] ind óenaig .i. rind aurlabra cech fir no marbtais do thabairt inna
3232] mbossán. & dobertis aurlabrai na cethrae do ilugud na comram hi
3233] sudiu & dobered cách a chomram and sin ós aird acht bá cách ar úair.
3234] & is amlaid dognítis sin a claidib fora slíastaib in tan dognítís in
3235] comram. Ar imsoítis a claidib friu in tan dognítis gúchomram.
3236] Deithbir ón ar no labraitis demna friu dia n-armaib conid de batir
3237] comarchi forro a n-airm.


3238] Tancatar Ulaid uli dochom ind oenaig acht dias namma .i. Conall
3239] Cernach & Fergus mac Roig. Ferthair a n-óenach ol Ulaid ni firfider
3240] ol Cu Chulaind co tí Conall & Fergus fo bíth ba haiti dó Fergus & ba
3241] comalta Conall Cernach. Asbert Sencha iarom. imberthar fidcella dún
3242] coléic & caniter drechta & agat clesamnaig. Dogníther iarom aní sin.


3243] A mbátar and iarom tairnid enlaith forsin loch ocaib. ní batar i
3244] nÉre énlaith ba caíni. Batar imtholtanaig na mná imna heónu
3245] imdarubart fair. Gabais cách dib immarbaig a mmuin a celi im
3246] gabail na n-én. Asbert Ethne Aitencáithrech ben Conchobair
3247] asagussim én cechtar mo da gúaland {folio 43b} dind énlaith ucut. Assagussem
3248] uli ol na mná aní sin. Má gabtair do neoch is damsa cetagébthar ol
3249] Ethne Inguba ben Con Culaind. Cid dogénam ol na mná. ni handsa
3250] for Leborcham ingen Oa & Adairce rigasa úaib do chuinchid
3251] Con Culaind.


p.105


3252] Luid iarom Coin Culaind & asbert fris. is ail dona mnáib ind
3253] eoin ucut úatsiu. Atetha a claideb do imbirt furri. Ni fogbat
3254] merdrecha Ulad a n-aill acht foraim én dóib do thabairt fornd indiu.
3255] Ni cóir duit ém for Leborcham fúasnad friu ár is triut atá in tres anim fil
3256] for mnáib Ulad .i. guille. ar it é téora anmi fil for mnaib Ulad .i. cluíne
3257] & minde & guille. ár cech ben ro charastar Conall Cernach. ba clóen cach
3258] ben dano ro charastár Cúscraid Mend Macha mac Conchobair dobered
3259] forminde fora erlabrai atá samlaid. cech ben ro charastar Coin Culaind
3260] no gollad iarom a rosc fo chosmailius Con Culaind & ara seirc ar bá dán
3261] dosom in tan ba n-olc menma no slocad indala suil conna roched corr
3262] inna chind. Dotéirged indala n-aí immach commeit chori cholbthaigi.


3263] Indel dún in carpat a Laich ol Cu Chulaind. Indlis Lóeg iarom in
3264] carpat & téit Cu Chulaind sin carpat. & ataig taithbéim dia claidiub
3265] dóib co ruildetar a mbossa & a n-eti dind usciu. Nos gaibet uli iarom &
3266] dosbertatatár leo. & fodailset dona mnáib conná rabi ben nád rissed dá én
3267] diib acht Ethne Ingubai a hóenur. Tánic de iarom coa mnaí fessin.
3268] Is olc do menma ol Cu Chulaind fria. Ní holc ol Ethne. úair is uaim
3269] fodailter doib. Is dethbir dait ol si ni fil diib mnaí nachit charad no ná
3270] beth cuit dait. Uair mád messi ni fil cuit do nách ailiu inniumsa acht
3271] duitsiu th'óenur. Nábad olc do menma trá ol Cu Chulaind dia tísat
3272] eóin Mag Murthemni l^ Boind in da én ba haildem dib duticfat.


3273] Nibo chían iarom co n-accatar da én forsind loch & rond dercóir
3274] etorro. Cansit ceól mbec. Torchair cotlud forsin slóg. Atraig
3275] Cu Chulaind a ndocum. día coistithe frim or Láeg & ol Ethne ní rigtha
3276] chucu. ar itá nách cumachta fora cul na n-én sa atethatár eóin damsa
3277] chena. In dóig bát dom éligudsa ón ol Cu Chulaind. Gaibthi cloich
3278] isin tailm a Loíg. Geibthi Lóeg íarom {folio 44a} cloich & dobeir isin tailm.
3279] Dosleci Cu Chulaind cloich foraib. Focairt imroll. Fe amae ol se.
3280] Gaibid cloich n-aile. Dosleic dóib & luid seocu. Am trúsa tra ol se
3281] ó gabussa gaisced niro la imroll mo urchur cussindiu. Fochairt a
3282] chroísig forro co lluid tré scíath n-ete indala heóin la sodain. Lotair
3283] foa lind.


3284] Dotháet Cu Chulaind iar sin co tard a druim frisin liic & ba holc a
3285] menma leis & dofuit cotlud fair. Co n-accai in da mnaí cucai. Indala
3286] n-ai brat úaine impe. Alaili brat corcra cóicdíabail im sude. Dolluid
3287] in ben cosin brot úane chucai & tibid gen fris. & dobert béim dind
3288] echfleisc dó. Dotháet alaili cucai dano & tibid fris & nod slaid fón alt
3289] cétna. & batar fri cíana móir oca sin .i. cechtar dé immasech cucai
3290] beus dia bualad combo marb acht bec. Lotir úad iarom


3291] Arigsitar Ulaid uli aní sin & asbertatár ara nduscide. Acc ol
3292] Fergus nachi nglúasid res atchi. Atracht iarom trena chotlud. Cid


p.106


3293] dotrónad ol Ulaid fris. Niro fet iarom a n-acallaim. Nom berar
3294] for se dom sergligu .i. don Teti Bricc. naba do Dún Imrith. l^ do
3295] Dún Delca. Not bertar do saigid Emiri do Dún Delca for Láeg.
3296] Aicc ol se mo breith don Teti Bric. Berair ass iarom co mboí co cend
3297] mbliadna isin magin sin cen labrad fri nech etir.


3298] Lathi n-and resin tsamfuin aile cind bliadna. A mbátar Ulaid
3299] imbi isin taig .i. Fergus etir & fraigid. Conall Cernach etir & crand.
3300] Lugaid Reóderg etir & adart. Ethne Ingubai fria chossa. A mbatar
3301] iarom fón samail sin tánic fer chucu isa tech & dessid forsind airiniuch
3302] na imdai i mboí Cu Chulaind. Cid dottucai and sin ol Conall Cernach.
3303] Ni handsa ol se. Mád ina sláinti ind fir fil sund robad chomairche ar
3304] Ultaib ulib. inid i lobrai & i n-íngás dano atá is móo de as comairche
3305] airthiu. Ní agur nech iarom uair is dia acallaim dodeochad. Tathut
3306] fáelte ni áigther ní ol Ulaid. Atraig iar sin inna sesam & gabais doib
3307] inna rundu sa sis iarom.{folio 44b}

    1. 3308] A Cu Culaind fot galar
      3309] nibo sirsan in t-anad
      3310] not ícfitís díamtis lat
      3311] ingena Aeda Abrat
    2. 3312] Asbert Li Ban i mMaig Cruaich
      3313] bís for deis Labrada Lúaith
      3314] robad cridiscel la Faind
      3315] coibligi fri Coin Culaind
    3. 3316] Robad inmain lá mád fír
      3317] ricfed Cu Chulaind mo thir
      3318] ra mbiad arcat & ór
      3319] ro mbiad mór fina do ól
    4. 3320] Diammad chara dam co se
      3321] Cu Chulaind mac Soalte
      3322] i n-atconnarc ina súan
      3323] bes atcoad cena slúag
    5. 3324] I mMaig Murthemni sunt tess
      3325] aidchi samna nib amles
      3326] domficfe uaimse Li Ban
      3327] a Cu Chulaind cot galar.

      a Cul^. c.


3328] Coich thussu ol iat. messi Óengus mac Áeda Abrat ol se. Luid
3329] úadib iarom in fer & ni fetatar cia deochaid l^ can donluid. Atraig
3330] u hulaind ina sudi iarom & labrais iar sin. Bá mithig ém ol Ulaid
3331] aní sin isnith cid a ndotrónad. Atconnarc ém ol se aislingi immón


p.107


3332] samain innuraid. Adfét dóib uli amal atchonnairc. Cíd dogentar
3333] di sund a popa Choncobair ol Cu Chulaind. Dogéntar ol Concobar
3334] orta co rís in corthe cétna.


3335] Luid Cu Chulaind ass iarom coránic in corthe co n-accai in mnaí
3336] bruit úani chucai. Maith sin a Cu Chulaind ol si. Ní maith dún ém cid
3337] for túrusi chucund innuraid ol Cu Chulaind. Ní du for fogail ém ol si
3338] dodeochammárni acht is do chuinchid for caratraid. Dodeochadsa
3339] ém dot acallaimsiu ol in ben o Faind ingin Aeda Abrat ros léci
3340] Manandan mac Lir. & dorat seirc duitsiu iarom. Li Ban dano
3341] m'ainmse féin. Timarnad duit iarom óm céliú o Labraid Luathlam ar
3342] claideb. Dobéra deit in mnai ar debaid n-óenlai leis fri Senach
3343] Síaborthe & fri Ecdaig nIúil & fri Eogan nInbir. Nim tha maith em
3344] ol se do chath fri firu indiu. Bid gar úar aní sin or Li Ban. Bía
3345] slan & doformastar deit a ndotesta dit nirt. Is denta dait ar Labraid
3346] ani sin ar is e láech as dech di ocaib domain. Cisi airm hi taside for
3347] Cu Chulaind. Itá i mMaig Mell ol si. Is ferr damsa techt leth n-aill
3348] ol ind ingen. Táet Laeg lat ol Cu Chulaind d'fis in tiri asa tudchad.
3349] Taet iarom oLi Ban.


3350] Lotar iarom co rancatar co airm i mboí Fand.{folio 45a} Tic iarom Li Ban
3351] dia saigid Loíg & geibthi ar gúalaind. Ni raga ass tra a Loig ol Fand
3352] indiu i mbethu acht manit ainge ben. Nibo ed as mó ro gnathaigsem
3353] dún custrathsa for Loeg bancomarchi. Appraind & bithappraind
3354] nach hé Cu Chulaind fil it richt indossa or Lí Ban. Bád maith limsa
3355] dano combad hé no beth and for Láeg.


3356] Lotar ass iarom co rancatar tóeb na indse. Co n-accatar in
3357] lungine crédume forsind loch ara cind. Tiagait íarom isin lunga &
3358] tíagait isin n-insi & lotar do dorus tige co n-accatar in fer chuchu is
3359] and asbert Lí ban fris

    1. 3360] Cate Labraid Luath lám ar claideb
      3361] as cend mbuden mbúada.
      3362] búaid úas chret charpait glinni
      3363] dercas rinni ruada.


3364] Frisgart dissi in fer iar sin co n-epert so fria.

    1. 3365] Atá Labraid luithe cland
      3366] nibá mall bid imda.
      3367] tinol catha cuirther ár
      3368] diambá lan Mag Fidgae


3369] Tíagait iarom isa tech co n-accatar tri cóechto imdad istig. & tri
3370] coícait ban indib. Fersait ule faelti fri Lóeg. Is ed asbertatar ulí fris.


p.108


3371] Fo chen duit a Loig di ag neich las tudchad & o tudchad & dit dáig
3372] fesni. Cid dogena fechtsa a Loig for Lí Ban in raga do acallaim
3373] Fainde coléic. Ragat acht co fíasur in n-airm atá. Ni handsa. Atá i
3374] n-airicul fo leith ol Lí Ban. Lotar iarom día hacallaim. & feraisside
3375] fáelte friu fon innas cétna. Fand didiu ingen Áeda Abrat .i. áed tene
3376] is hé tene na súla in mac imlesen. Fand iarom ainm na dére dotháet
3377] tairis. Ara glaini ro ainmniged disi sin & ara coími ar ní boí isin bith
3378] frisa samailte chena. In tan mbátar and iarom co cúalatar culgaire
3379] carpait Labrada dund insi. Is olc menma Labrada indiu ol Li Ban.
3380] Tíagam día ac{folio 45b}callaim. Tíagait ass immach. & ferais Li Ban faelti
3381] fris. co n-epert.
    r.
    1. 3382] Fo chen Labraid Lúath
      3383] lam ar claideb
      3384] comarbae buidne
      3385] snede slegaige
      3386] slaidid scíathu
      3387] scailid gou
      3388] créchtnaigid curpu
      3389] gonaid sóeru
      3390] saigid oirgniu
      3391] aildiu innaib
      3392] manraid slúagu
      3393] sreid muíne
      3394] fobartach fían fo chen.

      fo chen Labraid.


3395] Nis frecart Labraid beus & asbert ind ingen atheruch.
    r.
    1. 3396] Fo chen Labraid Lúath
      3397] lam ar claideb augra
      3398] urlam do rath
      3399] rurtech do chách
      3400] saigthech do cath
      3401] créchtach a thóeb
      3402] cundail a bríathar
      3403] brigach a chert
      3404] cartach a flaith
      3405] laimtech a des
      3406] diglach a gus.
      3407] tinben laeochu
      3408] Labraid fo chen.

      f. L.


3409] Niro regart beus Labraid canaidsi laíd n-aili affridissi.

p.109

    r.
    1. 3410] Fo chen Labraid Lúath
      3411] lam ar claidem
      3412] láechdu ócaib
      3413] uallchu murib
      3414] manraid gossa.
      3415] gniid cathu
      3416] críathraid ócu
      3417] tocbaid lobru
      3418] tairnid triunu
      3419] fo chen Labraid.

      f.L.


3420] Ní maith a n-asberi a ben ol inti Labraid conid and asbert.

    r.
    1. 3421] Ni ual na húabur dam a ben
      3422] nach ardarcnid mellchai mescthair ar cond
      3423] rechmi cath n-imrind n-imda n-imamnas
      3424] imberta claideb nderg ar dornaib desaib
      3425] tuathaib ilib oenchridiu Echdach Iúil
      3426] nitan bi nach n-úall.
      3427] ni uall ní uabar dam a ben.


3428] Bad maith lat do menma tra ol in ben or Li Ban fris atá Lóerg ara
3429] Con Culaind sund & timarnád duit úad doticfa slóg úad. Ferais
3430] Labraid faelti fris iarom a n-asbert. Fo chen duit a Laíg fo bíth na
3431] mná las tánac & in cháich o tudchad. Dó duit do tig a Laíg or
3432] Labraid & ragaid Lí Ban it díaid.


3433] Tic Laeg ass iarom co Emain & adfet a scéla do Choin Culaind &
3434] do chach olchena. Atraig Cu Chulaind iar sin na sudi. & dobert láim
3435] dara agid & acallais Láeg co glé & ba nertiti leis a menma na scéla
3436] adfiadar do in gilla.

{folio 46a}


3437] Baí dano terchomrac oc crethri ollchoecedaib Herend ind inbaid
3438] sin dús in faigbitis nech bad toga leo dia tibertis rígi nErend. Úair
3439] bá holc leo tilach airechais & tigernais Herend .i. Temair a bith cen
3440] rechtgi ríg furri. & bá olc léo na túatha cen smacht rig oc cocertad a
3441] cotrebi. Ár bátar fir Herend cen smacht ríg forro fri re .uii. mbliadna
3442] iar ndith Conaire i mBrudin Dá Derca cussin mórdail sin cethri cóiced
3443] nErend hi Temraig na rig hi tig Erc meic Corpri Niad Fer.


3444] At íat so im ríg bátar isin dail sin .i. Medb & Ailill. Cú Roí &
3445] Tigernach Tétbannach mac Luchtai & Find mac Rossa. Ní dentais
3446] iarom ind fir sea comairli ríg fri Ultu fo bith ar is d'óenóentaib bátar
3447] ind fir se hi cend Ulad.


3448] Dognither iarom tarbfes leo and sin co fíastais esti cía
3449] día tibertais rigi.


p.110


3450] Is amlaid dognithe in tarbfes sin .i. tarb find do marbad & óenfer
3451] do cathim a satha día eóil & da enbruthi. & cotlud dó fón saith sin. &
3452] ór firindi do cantain do cethri drudib fair & atchíthe dó i n-aslingi
3453] innas ind fir no rígfaide and asa deilb & asa turascbail & innas ind
3454] oprid dognith. Díuchtrais in fer asa chotlud & adfíadar a res dona
3455] rigaib .i. móethoclaech sáer sonairt co nda cris derca tairis & sé os
3456] adart fir i sirc i nEmain Macha.


3457] Faiditir iarom techta frisin co Emain. Is and sin bátar Ulaid ina
3458] turchomruc im Choncobor i nEmain in tan sin & Cu Chulaind ina
3459] seirgligu and. Atfiadat a scéla do Choncobor & do mathib Ulad
3460] olchena. Fil linni mac sáer soceneoil fon samail sin ol Concobar .i.
3461] Lugaid Réoderg mac na tri Find Emna dalta Con Culaind fil os adart
3462] na himda thall amne oc urgartigud a aiti .i. Con Culaind fil hi sirg.
3463] Atraig Cu Culaind andaide & gebid for tecosc a daltai conid and
3464] asbert.{folio 46b}

    1. 3466] Nirbat taerrechtach debtha dene dóergairce.
      3467] Nirbat díscir dóichlech díummasach.
      3468] Nibbát ecal ocal opond esamain.
      3469] Nipát tairne ó main mandartha mesctha.
      3470] Nibat dergnat colla coirme hi tig rurech.
      3471] Nibat ilfurig im írad n-echtrand.
      3472] Ní sáis daine dochla díchumaing.
      3473] Ní íadat iubaili for étechu ail.
      3474] Airliter cumni cóich cormarbai cré.
      3475] Cuibsigter sencaid sin co firinne fiu hit fíadnaisi.
      3476] Finnatar bethamain brathir scéo mbroga.
      3477] Mrogatar genelaigi gesci úa geniter gein.
      3478] Gairter bi beoaigter fri oethu. airm irro trebsat mairm.
      3479] Maínigter comarbai fora thechtu thoich.
      3480] Tocumlúat anfini coa nemthe nert.
      3481] Ni fresnesea co labur.
      3482] Ni aisneisea co glórach.
      3483] Ní fuirse.
      3484] Ní chuitbe.
      3485] Ní faitchither senori.
      3486] Nipá mithomtinach o neoch.
      3487] Ní géis co ansa.
      3488] Ni ettis nech cena domanches.

      p.111


      3489] Caínoís. Caínéra. Caínairlice.
      3490] Bát umal múnta ó gáethaib.
      3491] Bat cumnech coisc ót senaib.
      3492] Bát seichmech ríagla athardai.
      3493] Nipat úarcraidech im chardiu.
      3494] Bat gusmar im naimtiu.
      3495] Nipa frithenech debtha hit ilchomraicib.
      3496] Nirbat scelach athcossanach.
      3497] Ni faisce.
      3498] Ni thaisce ní.
      3499] Níba torba.
      3500] Consecha do cursachad i ngnímaib antechtai.
      3501] Ni chomainse th'irinne ar thoil daine.
      3502] Nibát athboingid ar narbat aithrech.
      3503] Nibat comromach ar nábat miscnech.
      3504] Nirbat lesc ar narbat meirb.
      3505] Nirbat roescid arnabat doescair.
      3506] Ardotchuibdig fri sechem na mbriathar sin a meic.


3507] Is and asbert Lugaid inso sis fri Coin Culaind.

    1. 3508] Ed as mait a mbith ule
      3509] arin festar cach dune
      3510] noco teseba ní de
      3511] firfaider mádurise.


3512] Luid Lugaid iar sin frisna techtaib co Temraig & gongarar garm
3513] rigi dó & fais hi Temraig ind aidchi sin & luid cach dia mennut iar sin.


3514] Imthusa im Con Culaind iss ed adfíastar sund coleic. {folio 47a}Do duit uaim
3515] a Laíg for Cu Chulaind co airm hi ta Emer & innis condat mná sidi
3516] rom thathigset & rom admilset & apair fria is ferr a chách itosa & táet
3517] dom indnaigid. is and asbert in gilla oc nertad Con Culaind inso.

    1. 3518] Mór espa do láech
      3519] laigi fri súan serglige.
      3520] ar donadbat genaiti .i. mna
      3521] áesa a Tenmag Trogaigi. .i. a Maig Mell
      3522] condot rodbsat
      3523] condot cachtsat
      3524] condot ellat
      3525] eter briga banespa.

      p.112


      3526] Diúchtra .i. erig a terbaig andregoin .i. a galar ban sidi
      3527] ar dotáet do lochbriga .i. do laechbriga
      3528] eter argaib .i. anradaib erritib.
      3529] condot rudi sudi n-óg.
      3530] condot chellti .i. co nderna
      3531] condot chiúrthi margnímu.
      3532] Día focart lúth Labrada
      3533] a fir rudi atraí coropat mor.

      mór e.


3534] Téit in gilla iar sin co airm i mboí Emer & adfét amal boí
3535] Cu Chulaind. Olc duitsiu a gilli for si ar is tú taithiges in síd cen feib
3536] íca do tigerna d'agbáil lat. Truag d'Ultaib for si cen sirthin a márica.
3537] Diambad Conchobur credbaigte l^ Fergus ni thastar súan l^ Conall
3538] Cernach tabsat crechta is Cu Chulaind cobarthe. Cachainsi iarom laíd
3539] la sodain fon cruth sa.

    1. 3540] [A] A meic Riangabra fó rír
      3541] cid menic imthigi in síd
      3542] ní moch doroich let ille
      3543] icc meic delba Dechtere
    2. 3544] Trúag d'Ultaib co lín garta
      3545] eter aite is chomalta
      3546] cen siriud in domain duind
      3547] d'ícc a carat Con Culaind
    3. 3548] Mád Fergus no beth i ssúan
      3549] dá n-iccad aicned oendrúad
      3550] ní bíad mac Dechtere i fos
      3551] co fagbad drui dia tomos
    4. 3552] Díambad hé Conall chena
      3553] fris mbetís crechta is cneda
      3554] no sirfed in Cú in mith mbras
      3555] co fagbad liaig da leges
    5. 3556] Mád do Láegaire Búadach
      3557] tísad ág bád imuallach
      3558] no sirfed Herind na n-íath
      3559] d'íc meic Connaid meic Iliach

    6. p.113

    7. 3560] Dambad do Cheltchar na celg
      3561] tísad súan & sírserg
      3562] robad astrach aidchi is lá
      3563] eter sídaib Setantá.
    8. 3564] Dámbad Furbaidi na fían
      3565] no beth i llige lanchían
      3566] no sirfed in domon ndron
      3567] co fagbad a thesarcon
    9. 3568] Atbathsat slúaig síde Truim
      3569] ro scarsatar a morgluind
      3570] ní thét a ccu dar cona
      3571] o ro gab súan síthbroga
    10. 3572] Uchan do galur nom geib
      3573] ó Choin cherda Conchobair
      3574] isáeth rem chridi is rem cnes
      3575] día tísad dím a leges.
    11. 3576] Uchan is crú mo craide
      3577] serg for marcuch in maige
      3578] conna toraig sund ille
      3579] d'óenuch Muge Murthemne
    12. 3580] Is de ná tic a hEmain
      3581] dáig na delba ron dedail
      3582] is merb is is marb mo guth
      3583] dáig atasom fó drochcruth
    13. 3584] Mí & rathe & bliadain
      3585] cen chotlud fó chomríagail.
      3586] cen duini bad bind labra
      3587] ní chúala a meic Riangabra

      a meic R.


3588] Tanic Emer rempi co hEmain iar sind d'innaigid Con
3589] Culaind & dessid issind imdaí i mbaí Cu Culaind & ro baí cá rád
3590] is mebul duit or si laigi fri bangrád. Uair dogénad galar duit
3591] sirligi & baí ca acallaim & ro chan laíd {folio 47b}

    1. 3592] Erig a gérait Ulad
      3593] rod dúsci suan slán subach
      3594] deci ríg Macha mo cruth
      3595] nit leci re rochtolud

    2. p.114

    3. 3596] Deca a gúalaind lán do glain
      3597] déca a churnu co comraim
      3598] déca a chairptiu cinnit glend
      3599] déca a rretha fían fidchell
    4. 3600] Déca a churadu co mbríg
      3601] déca a ingenraid n-ardmín
      3602] déca a rígu rem n-aga
      3603] déca a rignu dermára
    5. 3604] Déca tossach gemrid gluair
      3605] déca cach ingnad ar n-úair
      3606] déca let iss ed fótgní
      3607] a fuacht a fot a hamlí
    6. 3608] Is meth ní maith cotlud trom
      3609] is mertan ar n-écomlond
      3610] is loim for saith suan hi fat
      3611] tánaisi d'éc éccomnart
    7. 3612] Ro dusig suan síd ar n-ól
      3613] telci ri robruth romór
      3614] ilar mbriathar mbláith rot char
      3615] érig a gerit Ulad.

      erig. a U.


3616] Atracht iarom Cú Chulaind iar sind & dorat laim dara agid &
3617] ro chuir a mertnigi & a tromdacht de & atracht iar sin & tanic
3618] remi iar sin co mboí i nAirbi Roír. Co n-acca chuci iar sin
3619] Li Ban & ro ráid ind ingen friss & baí oca thócuriud [H] din tsíd.
3620] Cisi airm hi tá Labraid ol Cu Chulaind. Ni handsa ol si.

    1. 3621] [M] Atá Labraid for lind glan
      3622] día n-aithiget buidni ban
      3623] níba scíth let techt día tuaid
      3624] [H] mád ar fis Labrada Luaith
    2. 3625] Laínid tech a des tindben cét
      3626] eolach inti asidfet
      3627] corcair co n-aldi datha
      3628] samail gadi Labrada

    3. p.115

    4. 3629] [M] Crothid conchend catha ceirp
      3630] fiada chlaidib thana deirg
      3631] bruid idnu buden mbáeth
      3632] brisid scíathu lenna laech
    5. 3633] [H] Li sula a chnes isin tres
      3634] ni mairnd cairdiu a forámles
      3635] inrice feraib side
      3636] fer ro selaig mór mile
    6. 3637] Láechdu ocaib amru scéoil
      3638] rosiacht tír echach Iuil
      3639] folt fair amal flesca óir
      3640] bolad fína lía anóil
    7. 3641] Amru feraib fúabair nith
      3642] is garg fri cíana cocrích
      3643] riadu curach & graig
      3644] sech inis hi tá Labraid.
    8. 3645] Fer co n-ilur gním dar ler
      3646] Labraid Lúath lam ar claideb
      3647] ni fuband conroithi de
      3648] is fulang súain sochaide
    9. 3649] Srian muinci dergóir fria graig
      3650] & nocon ed nammá
      3651] turid airgit & glain
      3652] iss ed fil is tig hi ta

      ata L. f.


3653] [M] Noco ragsa ar Cú Culaind ar cuiriud mná ticed iarom ar ind
3654] ingen Lóeg and sút d'is cech réta. Tiat iarom ar Cú Culaind.
3655] Atralacht Lóeg iarom lasin n-ingin & dochuatar do Maig Lúada
3656] & don Biliu Buada & dar Oenach nEmna & i nÓenach Fidga &
3657] is andside baí Áed Abrat cona ingenaib. Feraid Fand failte
3658] fri Lóeg. Cid dia mbaí Cu Chulaind cen tíachtain or si. Nirbo
3659] ail leiss tiachtain ar banchuriud & dano co finnad inn uaitsiu
3660] rosiacht fis dó. Is uaim ar si & ticed co lúath diar saigid ar is
3661] indiu curthir in cath.


3662] Luid Láeg atheroch co airm i mboí Cu Chulaind & Fand malle fris Cinnas sin
3663] a Loíg ar Cu Chulaind. Ro frecair Láeg & ro radi is mithig techt
3664] ar se uair ita in cath oca ferthain indiu & is amlaid roboí oca rád
3665] & ro chan laíd.{folio 48a}


p.116

    1. 3666] Ranacsa rem rebrad ran
      3667] bale ingnad ciarbo gnád
      3668] connici in carnd fichtib drong
      3669] hi fúar labraid lebarmong
    2. 3670] Co fuarusa hé sin charnd
      3671] ina sudi mílib arm
      3672] mong buide fair alli dath
      3673] ubull oir ocá íadad
    3. 3674] Corom aichnistar iaraim
      3675] a lleind chorcra coicdiabail
      3676] atbert rim in raga lim
      3677] don tig hi fail Faelbe Find
    4. 3678] Atát na dá rig is tig
      3679] Failbe Find & Labraid
      3680] tri .l. im chechtar dé
      3681] is é lín inn óentaige
    5. 3682] .L. lepad na leith deiss
      3683] & .l. airides
      3684] .l. lepad na leth chlí
      3685] & .l aeridi
    6. 3686] Colba do lepthaib cróda
      3687] úatne finna forórda
      3688] is si caindell ardustá
      3689] in lía lógmar lainerdá.
    7. 3690] Atat arin dorus tíar
      3691] insinn aith hi funend grían
      3692] graig ngabor nglas brec a mong
      3693] is araile corcordond
    8. 3694] Atát arin dorus sair
      3695] tri bile do chorcor glain
      3696] dia ngair in énlaith búan bláith
      3697] don macraid assin rígráith
    9. 3698] Ata crand i ndorus liss
      3699] ni hétig cocetul friss
      3700] crand airgit ris tatin grían
      3701] cosmail fri hór a roníam

    10. p.117

    11. 3702] Atat and tri .xx crand
      3703] comraic nad chomraic a mbarr
      3704] biatar tri .c. do cach crund
      3705] do mes ilarda imlum
    12. 3706] Atá tipra sin tsíd thréll
      3707] cona tri .l. breclend
      3708] & delg óir cona li
      3709] i n-óe cecha breclenni
    13. 3710] Dabach and do mid medrach
      3711] oca dáil forin teglach
      3712] maraid beós is búan in bes
      3713] conid bithlan do bithgs
    14. 3714] Ita ingen is tig trell
      3715] ro derscaig do mnaib Érend
      3716] co fult budi thic immach
      3717] is sí alaind illánach
    15. 3718] In comrád doní ri cách
      3719] is alaind in ingnath
      3720] maidid cridi cech duni
      3721] dia seirc is dia inmuni
    16. 3722] Atrubairt ind ingen trell
      3723] coich in gilla na haichnem
      3724] masa thú tair bic i lle
      3725] gilla ind fir a Murthemne
    17. 3726] Dochúadusa co foill foill
      3727] rom gab ecla dom onóir
      3728] atbert rim in tic ille
      3729] oenmac dígrais Dechtere
    18. 3730] Mairg ná dechaid o chíanaib
      3731] & cach icá iarrair
      3732] co n-aiced immar ita
      3733] in tech mór atchonnarcsá
    19. 3734] Dambad lim Ériu ule
      3735] & ríge Breg mbude
      3736] dobéraind ní láthar lac
      3737] ar gnais in bale ránac.

      ranac .r.


p.118


3738] Is maith sin ar Cú Culaind. Is maith ar Lóeg & is cóir dul
3739] día ríachtain & is maith cach ní issin tír sin & is and asbert Loeg
3740] beós frisseom ic innisin oibniusa in tsída.

    1. 3741] Atconnarc tír sorcha sáer
      3742] inná ráiter gó ná cloen
      3743] fil an rí rúamna buden
      3744] Labraid Lúath lam ar claideb.
    2. 3745] Oc techt dam dar [H] Mag Lúada
      3746] [M] dommárfas Bili Búada
      3747] ro gabus i mMaig Denna
      3748] la dá natraig imchenna
    3. 3749] Is and atrubairt Lí Ban
      3750] isin baliu i rrabammar
      3751] robad [H] inmain lem in[M] firt
      3752] diambad Chú no bet it richt
    4. 3753] Alaind bantrocht búaid cen chacht
      3754] ingena Áeda Abrat {folio 48b}
      3755] delbad Fainne fúaim co llí
      3756] ni roacht rígna ná rí
    5. 3757] Atber úair is lim ro clos
      3758] sil nAdaim cen imarbos
      3759] delbaid is Fainne rem ré
      3760] na fil and a llethete
    6. 3761] Atconnarc láechu co lli
      3762] co n-armmaib ic imdibí
      3763] atconnarc étach ndatha
      3764] nocon erred anflatha
    7. 3765] Atconnarc mná féta ic fleid
      3766] [H] atconnarc a n-ingenraid
      3767] [M] atconnarc gillu glána
      3768] oc imtecht ind fiddromma
    8. 3769] Atconnarc áes ciúil is tig
      3770] ic aerfitiud dond ingin
      3771] manbad a lúas tísa ammach
      3772] domgentais co hétréorach

    9. p.119

    10. 3773] Atconarc in cnoc ro buí
      3774] alaind ben Eithne in gubai
      3775] [H] acht in ben atberar sund
      3776] beres na slúagu asa cund.

      atconnarc m.


3777] Luid Cu Chulaind lee iarom is tir & bert a charpat les co rancatár in
3778] n-insi. Feraib Labraid fáelti fríu & fersi in bantrocht uli & ferais
3779] Fand dano fáelti sinredaig fri Coin Culaind. Cid dogentar sund
3780] hifechtsa ol Cu Chulaind. Ni handsa or Labraid iss ed dogenam regmai
3781] coro lam cor imón slúag. Tíagait ass iarom co rancatar tor na slúag
3782] & co rolsat súil tairsiu. & bá dirim leó in slúag Eirg ass hifechtsa ol
3783] Cu Chulaind fri Labraid. Luid Labraid ass iarom & anais Cu Chulaind
3784] ocon tslóg. Fanócrat in da fiach druiidechta dogensat in tslúaig. Is
3785] doig ol in slúag in ríastartha a Herind iss ed terchanait ind fiaich.
3786] Dossennat in tslúaig iarom conná fúair ined leó is tír. Dotháet Eochaid
3787] Iúil iarom do inlut a lam don tiprait matain moch. Atconnairc
3788] Cu Chulaind iarom a gualaind tresin cochull. Doléci gai dó co luid
3789] trít. ro marb tríar for trichait díb a oenur. Tofobairt iar sin Senach
3790] Siabortha & ferait morgleó & marbthus Cu Chulaind iarom. Tic
3791] Labraid iarom & mebais riam forsna slógu. Ro gáid Labraid dó anad
3792] dind imguin. Atagamar tra for Loeg in fer d'imbirt a ferci fornd
3793] úair nach lór leis di cath fúair. Tiagar for Lóeg & inliter teora dabcha
3794] úarusci do dibdúd a brotha. In cetna dabach i tét fichid tairse. In
3795] dabach tanaise nis fodaim nech ara tes. In tres dabach is comse a
3796] tes. In tan atconcatar na mná Coin Culaind is and cáchain Fand
3797] inso.

    1. 3798] Segda cairptech docing rot
      3799] cesu amulach is óc.
      3800] alaind lúadam luades blai
      3801] fescur iar n-óenuch Fidgai
    2. 3802] Ni céol side séol fodgain
      3803] is fordath fola fil fair.
      3804] cronan canas
      [gap: extent: 4 letters]
      chreit
      3805] focanat roith a ch
      [gap: extent: 6 letters]
    3. 3806] Eich fil fó charput glinne
      3807] an frim céin córda sille.
      3808] ni fúair a (samail) di graig
      3809] it lúathidir gaíth n-erraig.

    4. p.120

    5. 3810] Imbeir cóic deich ubull óir
      3811] ós clesit fora anóil.
      3812] ni fúair a samail di (rig)
      3813] eter mín & anmín.
    6. 3814] Fil i cechtar a da grúad
      3815] tibri derg amal c rúad
      3816] tibri uani tibri g
      [gap: extent: 3 letters]

      3817] tibri corcra dath n-étrom
    7. 3818] Fil secht suilse ara rusc
      3819] ni scél fácbala hi lusc.
      3820] (imdenam) súla saire
      3821] abratchair duba (daile)
    8. 3822] Fil fora chend cid fó fer
      3823] atchlos fo Érind imbel.
      3824] tri foi(lt ni hinand a nd
      [gap: extent: 1 letter]
      th)
      3825] gilla oac amulach.
    9. 3826] Claideb russi roindes c
      3827] cona imdurnd airgdidú.
      3828] sciath co (mbualid) óir budi
      3829] & co mbil findruini
    10. 3830] Cingid iar firu in cach tind
      3831] imthéit i n-ág i n-eslind.
      3832] ni fil do bar laechraid laind
      3833] as chosmail fri Coin Culaind.
    11. 3834] Cu Chulaind dotháet ille
      3835] in t-ócláech a Murtemne.
      3836] is íat dorat (sund) hi fat
      3837] ingena Aeda (Abrat)
    12. 3838] Bróenán fola fota fland
      3839] la toeb crand comarda dé
      3840] ilach uallach uabrech ard
      3841] la gol mairg fri síabru sé.

      (segda c.)


3842] Ferais Li Ban faelti fris iar tain conid and asbert inso sís.{folio 49a}


p.121

    1. 3843] Fo chen Cu Chulaind
      3844] torc .i. rí torachtaide
      3845] mál mór Maigi Murthemni
      3846] már a menma
      3847] míad curad cathbúadach
      3848] cride níad
      3849] nertlia gaíse
      3850] flandrúad ferci
      3851] aurlam fri firecrat
      3852] lath ngaile Ulad
      3853] alaind a lí
      3854] lí sula do andrib
      3855] is fo chen.

      fo chen. C.


3856] Ceist cid doronais a Cu Chulaind or Li Ban fris. is and asbert
3857] Cu Chulaind andaide

    1. 3858] Tarlucus urchur dom sleig
      3859] i ndúnad Eogain Inbir
      3860] nocon fetur sochla set
      3861] in buaid dorignius l^ in bet
    2. 3862] Cid ferr cid messu dom nirt
      3863] co sse ni tharlus dom chirt
      3864] urcur anfis fir hi céo
      3865] bes na n-árlaid duni beo
    3. 3866] Slog find forderg formnib ech
      3867] domroipnitar forom leth
      3868] munter Manandan meic Lir
      3869] cotagart Eogan Inbir
    4. 3870] Immimrous cipe cruth
      3871] in tan tánic mo lanlúth
      3872] oenfer dia tricha cet
      3873] conda rucus dochom n-éc
    5. 3874] Rochuala cneit Echach Iúil
      3875] i socraidi labrait biuil
      3876] mad fir co fír bes nip cath
      3877] in t-urcur ma tarlacad.

      tarlucus .u.


p.122


3878] [M] Foíd Cú Culaind iar sin lasin n-ingin & anais mís ina farrad.
3879] & celebraid hi cind mís di & atbertsi frissium in bale ar si atberasu
3880] frimsa dul it choimdáil ragatsa & is and dorónsat comdáil ic
3881] Ibur Cind Trachta. Ro innis do Emir aní sin. Dorónta scena
3882] acciside do marbad na ingine. Tánic & cóeca ingen lee connici
3883] in comdáil. Is and ro boí Cu Chulaind & Lóeg oc immirt
3884] fidchilli & níro airigset na mná chucu. Is and ro ráthaig Fand
3885] & asbert fri Lóeg. Fégsu a Laíg aní atchiusa. Cid insin ar
3886] Lóeg. Dercais Lóeg & is and ro radi ind ingen inso .i. Emer


3887] .r. Fég a Lóig dar th'eis oc coistecht frit filet mná córi
3888] ciallmathi co scenaib glasgéraib ina ndeslamaib co n-ór fria
3889] n-uchtbrunnib cruth caín atchichither amal tecait láith gaile dar
3890] cathcairptiu glé rosoí gné Emer ingen Forgaill.


3891] .r. Nít ágara ar Cu Chulaind & nícon tora etir. Tairsiu isin
3892] creit cumachta lasin suidi ngríanda form dreichsea fodéin ar
3893] dothesarcainbsea ar andrib ilib imdaib hi cetharaird Ulad ar cía
3894] nos baigea ingen Forcaill a hucht a comalta in gním co cumachta
3895] bés ní lim lámathair.


3896] Asbert beós Cu Chulaind


3897] .r. Not sechaimsea a ben amal sechnas cách a chárait ní
3898] rubimsea do gae crúaid crithlamach nach do scían tím thanaidi
3899] nách t'ferg treith timaircthech ar is mórdolig mo nert do scor
3900] ó nirt mná.


3901] Ceist trá ar Emer cid fódruair latsu a Chú Culaind mo
3902] dímiadsa fíad andrib ilib in chuichid & fíad andrib ilib na
3903] Hérend & fíad áes enig archena ar is fót clith tánacsa & fo {folio 49b}
3904] ollbríg do tharisen ar cia not bagea uall ollimresan bés nípad
3905] rith latsu mo lecunsa a gillai cía no trialltá.


3906] Ceist tra a Emer ar Cu Chulaind cid arna leicfideá damsa mo
3907] denus i ndáil mná ar chetus in ben sa is sí in glan genmnaid
3908] gel gasta dingbála do ríg ilchrothaig ind ingen sin do thonnaib
3909] dar leraib lánmóraib co ndeilb & écosc & sóerchenel co ndruni
3910] & lamda & lamthorud co ceill & chond & cabsaidecht co n-immad
3911] ech & bóthánte ar ní fil fo nim ní bad tol ria cóemchéle na
3912] dingned cía no comgelltá. a Emer ar se ni faigebasu curaid
3913] caín crechtach cathbúadach bádam fiusa.


3914] Bes ar Emer nocon err in ben día lenai. Acht chena is alaind
3915] cech nderg is gel cach nua is caín cech ard is serb cach gnáth.


p.123


3916] caid cech n-écmais is faill cech n-aichnid co festar cach n-eólas.
3917] A gillai ar si ro bámarni fecht co cátaid acut & ni bemmís dorisi
3918] diambad ail duitsiu & robo dograch furri. Dar mbrethir tra ar
3919] se isatt ailsiu damsa & bidat ail hi céin bat béo.


3920] Mo lecudsa didiu ol Fand. Is coru mo lecudsa ar Emer
3921] Náthó or Fand messi leicfidir and & is mé ro baeglaiged o chéin
3922] & forópair oc dogru & oc domenmain móir ar bá nar lée a lécud
3923] & dul día tig a chétóir & ro buadir in rograd hí dorat do
3924] Coin Chulaind & is amlaid ro boí oc dogru & doroni in laid sea.

    1. 3925] Messe ragas for astur
      3926] ce dech lim ar mórgestul
      3927] cé tara nech lín a blad
      3928] ropad ferr lim tairsem
    2. 3929] Robad ferr lim bith hi fus
      3930] dobér fót laim cen dobus
      3931] ná dula cid ingnad lat
      3932] co gríanan Áeda Abrat
    3. 3933] A Emer is lat in fer
      3934] & ro mela a deigben
      3935] aní ná roich lam cid acht
      3936] is écen dam a dútracht
    4. 3937] mor fer ro boí com iarraid
      3938] eter chlitar is diamair
      3939] noco dernad ríu mo dál
      3940] dáig is misi rop irán
    5. 3941] Mairg dobeir seirc do duni
      3942] menes tarda dia airi
      3943] is ferr do neoch a chor ass
      3944] mane chartar mar charas
    6. 3945] Cóeca ban tánac ille
      3946] a Emer án foltbuide
      3947] do tascrad ar Faind ní fó
      3948] is dá marbad ar andró
    7. 3949] Atat tri .l. rim la
      3950] do mnaib aille oentamá
      3951] acum i ndún immalle
      3952] noco treicfitis messe.

      mese.


p.124


3953] Iar sin ro fallsiged do Manandan aní sin .i. Fand ingen
3954] Áeda abrat do bith i n-ecomlund ic mnaib Ulad & a bith coa
3955] lécud do Choin Chulaind. Tanic iarom Manannán anair do
3956] saigid na hingini & ro boí ina fíadnaise & níro rathaig nech díb
3957] aní sin acht Fand a hoenur.& is and sin ro gab etere móir &
3958] drochmenmain in n-ingin oc fegad Manandán & dorigni laíd{folio 50a}

    Mac Lonan dixit
    1. Mían mná Tethrach .i. badb a tenid .i. gae & arm
      slaide sethnach .i. táeb iar sodain.
      suba .i. fuil luba .i. corp fo lubaib .i. fó feraib
      ugail .i. súli troga .i. cend dír drogain .i. fíaich
    1. 3959] Fégaid mac laechraidi Lir
      3960] do maigib Eógain Inbir
      3961] Manannán úas domun dind
      3962] ro boí tan rop inmain lim
    2. 3963] Mád indiu bá digrais núall
      3964] ní charand mo menma múad
      3965] is éraise in rét in tserc
      3966] téit a héol cen immitecht
    3. 3967] Lá ro bása & mac Lir
      3968] hi ngrianan Dúni Inbir
      3969] ropo dóig lind cen anad
      3970] noco bíad ar n-imscarad
    4. 3971] Danam thuc Manannan mass
      3972] robam céle comadas
      3973] noco berad orm ria lind
      3974] cluchi erail ar fidchill
    5. 3975] Danam thuc Manandan mass
      3976] robam céle comadas
      3977] dornasc d'ór aromthá
      3978] thuc dam i llúag m'imdergthá
    6. 3979] Baí acum dar fraech immach
      3980] .l. ingen illdathach
      3981] doratus dó .l. fer
      3982] centar in .l. ingen

    7. p.125

    8. 3983] Cetra .l. cen miri
      3984] iss é lucht inn óentigi
      3985] da .l. fer sonmech slán
      3986] dá .l. ban find follán
    9. 3987] Atchíu dar in muir i lle
      3988] nín acend nach meraige
      3989] marcach in mara mongaig
      3990] enand do sithlongaib
    10. 3991] T'imthecht seochainni co se
      3992] ni acend acht sídaige
      3993] maraid do chiall cech slúag séim
      3994] cía beit úait i n-etercéin
    11. 3995] Mad messe bá dethbir dam
      3996] dáig at báetha cialla ban
      3997] intí ro charus co holl
      3998] domrat sund i n-ecomlond
    12. 3999] Celebrad dit a Chú chain
      4000] aso sind uait co sochraid
      4001] cén co tísam dútracht lind
      4002] is ard cech recht co himchim
    13. 4003] Érgeseo mithig damsa
      4004] atá nech risnid [H] andsa[M] .i. risnad dolig
      4005] is mór in tócosol tra
      4006] a Laíg a meic Ríangabrá
    14. 4007] Ragat rim chéli fodéin
      4008] dáig noco dingnea m'amréir
      4009] nár apraid is ceim i cleith
      4010] mád alic duibsi fegaid.

      fegaid.


4011] Atracht ind ingen iar sin i ndíaid Mannannan & ro fer
4012] Manannan faelti fria. & asbert maith a ingen ar se in oc urnaidi
4013] Con Culaind bía fodechtsa l^ in limsa doraga. Dar ar mbrethir
4014] ém ol si fil uaib nech bad ferr lim a chéli do lenmain. acht ar si
4015] is letsu ragatsa & ni irnaidiub Coin Culaind ar rom thréc & araill


p.126


4016] and dano a degduini ní fil rígain catamail acotsu. ata autem la
4017] Coin Culaind.


4018] Ó'tconnairc im Cu Chulaind in n-ingin ic dula úad co
4019] Manannan ro ráid fri Lóeg. Crét sút ar sé. ni handsa ar Lóeg
4020] Fand ic dul la Manannan mac Lir ar ncorb álic duitsiu hí. Is
4021] and sin tra ro ling Cú Chulaind tri ardlémend & tri deslemend
4022] Lúacra co rrabi fri ré fotá cen dig cen bíad sechnon na slebte &
4023] is and no chotlad cech n-aidchi for Sligi Midluacra. Dochoid
4024] trá Emer do saigid Concobair co hEmain & ro innis dó
4025] Cú Chulaind amal ro boí. Ro faíd Conchobor filedu & áes dána
4026] & drúdi Ulad dia saigid co fastaitis & co tuctais co hEmain léo
4027] hé. Ro triallsom dano in n-áes ndána do mar{folio 50b}bad. Ro chansatside
4028] brechta druidechta ina agid coro gabait a chossa & a láma
4029] conos tanic trell dia ceill. Ro boíseom dano oc cuingid digi
4030] chucu iar sin. Tucsat na druíd dig ndermait dó. Amal atib in
4031] dig nirbo chumain laiss Fand & cech ní doroni. Tucait dano
4032] deoga dermait a héta do Emír ar nirbo ferr ro boí. Ro croth
4033] dano Manannan a brat eter Coin Culaind & Faind connaro
4034] chomraictís do gs. Conid taibsiu aidmillti co Choin Chulaind
4035] la háes sidi sin ar ba mór in cumachta demnach ria cretim. & ba
4036] hé a méit co cathaigtis co corptha na demna frisna doínib & co
4037] taisfentais aíbniusa & díamairi dóib. amal no betis co marthanach
4038] is amlaid no creteá doib. Conid frisna taidbsib sin atberat na
4039] haneolaig síde & áes síde.


p.127